"TikTok" sosial şəbəkə platforması üçün video çəkmək istəyərkən xəsarət alan yeniyetmə Bakıda ölüb.
TƏBİB-dən Bakuplus.az-a bildirilib ki, 2011-ci il təvəllüdlü şəxs 21.08.2026-cı il tarixində saat 23:00 radələrində Ağstafa Rayon Mərkəzi Xəstəxanasının Təcili tibbi yardım şöbəsinə hospitalizasiya olunub. Yanıq xəsarətləri alan şəxsə ilkin tibbi xidmət göstərilib və daha ixtisaslı tibbi xidmət almaq üçün Nərimanov Tibb Mərkəzinin nəzdindəki Yanıq Mərkəzinə təxliyə olunub. Sifətin, boyunun, hər iki yuxarı ətrafların ön və arxa səthlərin III-IV dərəcə elektrotravmalı ağır dərəcəli termiki yanığı diaqnozu təyin edilən şəxsin aparılan reanimasiya tədbirlərinə baxmayaraq, 22.08.2026-cı il tarixində saat 20:10 radələrində ölüm faktı qeydə alınıb.
Qeyd edək ki, yeniyetmə dəmiryolu ərazisində vaqonların üzərinə çıxaraq video çəkmək istəyərkən onu elektrik cərəyanı vurmuşdu.
