Bakının Nizami rayonunda 49 yaşlı kişinin keçmiş arvadı ilə mübahisəsi cinayətlə nəticələnib.
1977-ci il təvəllüdlü Həsən keçmiş həyat yoldaşı Ülkərə (adlar şərtidir) xəsarət yetirib.
İstintaq sənədlərinə əsasən, Həsən keçmiş arvadının mobil telefonuna baxarkən onun dostunun nömrəsini "Ürəyim" kimi qeyd etdiyini görüb. Buna görə aralarında qısqanclıq zəminində mübahisə yaranıb və Həsən qadının sol sifət nahiyəsinə bir dəfə zərbə vurub.
Həsən ifadəsində bildirib ki, Ülkərlə 2022-ci ildə boşansalar da, eyni mənzildə yaşayırlar. O, telefonda bir şəxsin nömrəsinin "Ürəyim" adı ilə qeyd edildiyini gördükdən sonra Ülkərdən bunun səbəbini soruşub. Qadının isə "sənə aidiyyəti yoxdur" cavabı Həsəni əsəbiləşdirib və ona zərbə vurub.
Ülkər isə keçmiş ərinin şəxsi həyatına müdaxilə etdiyini və hadisə zamanı onu təhqir edərək sifətinə zərbə vurduğunu bildirib.
Həsən Cinayət Məcəlləsinin 128-ci maddəsi ilə təqsirli bilinib.
Nizami Rayon Məhkəməsinin hökmü ilə o, 6 ay müddətinə azadlığın məhdudlaşdırılması cəzasına məhkum edilib. Cəza müddətində ona gecə saatlarında yaşadığı ünvanı tərk etmək, Bakı və Sumqayıt şəhərlərini, həmçinin Abşeron rayonunu tərk etmək qadağan olunub.
mənbə: demokrat.az
