Məsələni aydınlaşdırmaq üçün "Kayu" İnkişaf Mərkəzi ilə əlaqə saxladıq.
Mərkəzdən Bakuplus.az-a bildirildi ki, yazılan iddiaların heç bir əsası yoxdur:
"Bunların heç bir əsası yoxdur. Valideynə demək istəyərdim ki, əgər uşağınız bağçada şiddət görürsə, hansı ağılla yenidən aparıb ora qoyursunuz? Mən ana olaraq uşağımın hansısa yerdə şiddət gördüyünə əmin olsam, övladımı ora qoymaram. Məni neçə ildir tanıyan valideynlər var və onlar məni yaxşı tanıyırlar".
Bağçanın məsul şəxsi həmin valideynə dəfələrlə övladını mərkəzdən çıxartmağı təklif etdiklərini bildirib:
"Biz təklif etdik ki, bizə güvənmirsinizsə, övladınızı çıxarın. Çünki indi hər yerdə belə mərkəzlər var. Nə çıxardırlar, nə də bizə güvənirlər".
***
"Kayu" Tədris və İnkişaf Mərkəzinin "Əhmədli" filialında azyaşlı uşağa şiddət göstərildiyi iddia olunur.
Bakuplus.az xəbər verir ki, bu barədə Elnur Əliyev adlı vətəndaş sosial şəbəkə hesabında paylaşım edib.
O bildirib ki, 2 yaş 2 aylıq övladı mərkəzdən dəfələrlə üzü, gözü, alnı və digər nahiyələri göyərmiş vəziyyətdə evə qayıdıb. Valideynin sözlərinə görə, hər dəfə uşağın xəsarətləri "yıxılıb" deyə izah edilib. Bir dəfə isə uşağın bədənində çimdik izləri gördükdən sonra şübhələnib.
Elnur Əliyev bildirib ki, uşağı bağçadan göyərmiş halda gətirəndə oğlunun dil açmağa başladığını və ilk dediyi sözlərdən birinin "bolnıy sadik" olduğunu deyib. Onun sözlərinə görə, uşaq əli ilə alnını göstərərək bu ifadəni işlədib.
Valideynin iddiasına görə, bir müddət sonra uşağın gözü ciddi xəsarət alıb və sifətindəki göyərmə uzun müddət keçməyib. Sonuncu dəfə isə mərkəzdən götürdüyü zaman uşağın alnının gömgöy və şiş olduğunu görüb.
Valideynin sözlərinə görə, evə gəldikdən sonra uşağın 7 saat ərzində pampersinin dəyişdirilmədiyi və nəcis içində saxlanıldığı məlum olub. O, mərkəzi Elm və Təhsil Nazirliyinə şikayət edəcəyini bildirdikdə isə "hara istəyirsiz, şikayət edin" cavabını aldığını deyib.
