"Noyabrın 21-i ailəmizlə keçirdiyimiz növbəti gözəl axşam olmalı idi. Əvəzində ailəmizdə faciə baş verdi".
Bakuplus.az xəbər verir ki, bu sözləri Yasamaldakı yanğında həlak olan binanın sakini və komendantı Samir Məhəmmədovun həyat yoldaşı Marta Ramazanova "Facebook" hesabında yazıb.
Kiçik övladının həkimlərin səyi nəticəsində xilas edildiyini vurğulayan qadın hələ də xəstəxanada müalicə aldıqlarını, 4 yaşlı övladının oksigen aparatına qoşulu olduğunu deyib.
M.Ramazanova qeyd edib ki, hadisədən artıq 6 gün keçməsinə baxmayaraq, hələ də saçından qoxu getmir:
"4 yaşlı uşağın ağciyərlərində nəyin baş verdiyini təsəvvür etmək isə daha qorxuludur. Qoxu saçlarımdan getmir, hər saniyə mənə o dəhşətli axşamı xatırladır. Ancaq baş verə biləcək ən dəhşətli şey budur: mükəmməl ata, sevimli həyat yoldaşı, gözəl dost, məsuliyyətli işçi və nəhayət, ölkəsinin nümunəvi vətəndaşı dünyasını dəyişdi. O, artıq yoxdur. Bir gecədə bütün həyatımız dəyişdi. Dəyişən tək bizim həyatımız olmadı. Uşaqlarımın dostu, balaca Arzu da artıq yoxdur.
Biz, binanın sakinləri "bomj" kimi yaşayırıq. Əşyalarımızı paketlərə və çamadanlara yığırıq. Harada bacarsaq, orada sığınacaq tapırıq. Yaşamağa yerimiz yoxdur. Yeni il bayramını da harada və necə keçirəcəyimizi bilmirik. Uşaqlar nə baş verdiyini anlamır. Atalarının harada olduğunu və evə nə vaxt qayıdacağımızı soruşurlar. Onlara nə cavab verəcəyimi bilmirəm. Amma sonra başa salacam ki, səbəb atalarının ədalət uğrunda mübarizə aparmağa çalışmasıdır. Amma onu dinləmədilər. Ümid edirəm ki, o, sonuncu dəfə eşidiləcək. Günahkarlar qanunauyğun şəkildə sərt cəzalandırılmalıdır!"
M.Ramazanova xəstəxanada çəkdiyi şəkilləri də paylaşımına əlavə edib.
Qeyd edək ki, yanğında həlak olan Samir Məhəmmədov "Kapital Bank"da layihə meneceri olaraq çalışıb. Bədbəxt hadisə zamanı onun ailə üzvləri də tüstüdən zəhərləniblər. 2021-ci il təvəllüdlü oğlu Məhəmməd Mikayıl, digər oğlu Daniel və həyat yoldaşı Marta Ramazanova özəl xəstəxanalardan birinə köçürülüblər.
