Nərimanov Rayon Məhkəməsində dələduzluqda təqsirləndirilən Yunis Mehrabovun cinayət işi üzrə məhkəmə istintaqı yekunlaşıb.
Pravda.az xəbər verir ki,hakim Kamal Babayevin sədrliyi ilə keçirilən prosesdə hökm oxunub.
Yunis Mehrabov etibardan sui-istifadə və aldatma yolu ilə özgənin əmlakını ələ keçirməkdə, nəticədə zərərçəkmiş şəxsə xeyli miqdarda maddi ziyan vurmaqla dələduzluq əməli törətməkdə ittiham edilib.
İttihama əsasən, o, tamah niyyəti ilə zərərçəkmiş Zahir Nuralıyevin etibarını qazanaraq ona Dövlət Vergi Xidmətində geniş əlaqələrinin olduğunu bildirib, vergi borclarının silinməsi məsələsini həll edə biləcəyinə dair həqiqətə uyğun olmayan vədlər verib. Yunis zərərçəkmiş şəxsə məxsus şirkətdə mühasib işləyib. Zahir şirkətin 32 000 manat məbləğində vergi borcunun silinməsi məqsədilə Yunisa müraciət edib. Təqsirləndirilən şəxs həmin məsələnin həlli ilə bağlı hər hansı səlahiyyətə malik olmadığı halda, borcun silinməsini təşkil edə biləcəyini bildirərək zərərçəkmiş şəxsdə inam yaradıb. Təqsirləndirilən şəxs zərərçəkmişin ümumilikdə 15 000 manat pul vəsaitinin ələ keçirib, bununla da zərərçəkmiş şəxsə xeyli miqdarda maddi ziyan vurub.
Yunis Mehrabov məhkəmədə dələduzluq yolu ilə ələ keçirdiyi pul vəsaitini "Topaz" mərc oyunlarına yatırdığını və uduzduğunu etiraf edib.
Məhkəmənin hökmü ilə Yunis Mehrabov 2 il müddətə azadlıqdan məhrum edilib.
