Sabunçu Rayon Məhkəməsində qəsdən sağlamlığa az ağır zərər vurmaqda və xuliqanlıqda təqsirləndirilən Zəminə Səlimovanın (adı, soyadı şərtidir) barəsindəki cinayət işi üzrə məhkəmə iclası başa çatıb.
Pravda.az xəbər verir ki, ittiham aktına əsasən, hadisə 17 aprel 2025-ci il tarixdə, saat 9 radələrində paytaxtın Sabunçu rayonu, Bakıxanov qəsəbəsində olan marketlərin birinin qarşısında qeydə alınıb.
Belə ki, Zəminə Səlimova qeyd olunan marketin qarşısında toplanmış zibillərin guya market işçiləri tərəfindən yığıldığını iddia edərək, həmin obyektin müdiri, zərərçəkmiş Lamiyə Quluzadə (adı, soyadı şərtidir) ilə mübahisə edib. Mübahisə zamanı təqsirləndirilən şəxs heç bir əsaslı səbəb olmadan, xuliqanlıq niyyəti ilə zərərçəkmiş şəxsə zor tətbiq edərək onun barmağını sındırıb.
Hadisədən sonra Zəminə Səlimova saxlanılıb və barəsində polisin nəzarəti altına vermə qətimkan tədbiri seçilib.
Məhkəmə istintaqı zamanı dindirilən Zəminə Səlimova özünü təqsirli bilməyib. O deyib ki, hadisə günü xadimə işlədiyi aptekin içərisini və çöl tərəfini təmizlədikdən sonra evə gedib.
Onun sözlərinə görə, səhəri gün işə gəldikdə isə marketin qarşısında zibilin yığıldığını görüb. Bununla bağlı marketin müdiriyyətinə dəfələrlə müraciət etdiyini bildirib. Amma market işçiləri zibili marketin önündən təmizlədiklərini iddia edib. Daha sonra marketdə Zəminə və Lamiyə arasında mübahisə yaranıb. Həmin vaxt Lamiyə qapını bağlayıb, sonra isə açaraq Zəminəni vurub. Buna görə, Zəminə zərərçəkmişi itələyib və nəticədə barmağı sınıb.
Təqsirləndirilən şəxs qeyd edib ki, hadisə zamanı nalayiq söz işlətməyib və digər şəxslərin adlarını da xatırlamır.
Hakim Teymur Həsənovun sədrliyi ilə keçirilən prosesdə hökm elan edilib.
Hökmə əsasən, Z.Səlimova 1 il 1 ay 24 gün müddətə azadlığın məhdudlaşdırılması (elektron qolbaq) cəzasına məhkum edilib.
