Xalq artisti Tariyel Qasımov Bilgəh Kardioloji Sanatoriyasında özünə qarşı hörmətsizlik olunması ilə bağlı iddialar səsləndirib.
Aktyor bunu göndərişdə göstərilən tək otağın ona verilməməsi ilə əsaslandırıb:
“Bir həftə qaldım, çox pis şəraiti var, insanlara pis qulluq edirlər. Bu səbəbdən də acıq edib getdim. Acığın da dövlətə ziyanı var. Həmin sanatoriyada hər il oluram. Mənə gözəl qulluq ediblər, sənətkara, aktyora xüsusi diqqət olub. İndi oraya təzə rəhbərlik gəlib, davranışını, özünü idarə edə bilmir”.
Məsələ ilə bağlı “Bilgəh” kardioloji sanatoriyası qafqazinfo.az-a açıqlama verib:
“Xalq artisti Tariyel Qasımovun “Bilgəh” kardioloji sanatoriyası ilə bağlı səsləndirdiyi fikirlər həqiqəti əks etdirmir və tamamilə böhtan xarakteri daşıyır.
Nəzərinizə çatdırırıq ki, hörmətli Xalq artisti həmkarlar ittifaqlarından aldığı rəsmi yollayış əsasında sanatoriyaya gəlib. Yollayışda onun ikinəfərlik otaqda qalacağı qeyd olunub və sənədə əsasən, o, digər bir şəxslə birlikdə həmin kateqoriyaya uyğun otaqda yerləşdirilib.
Lakin daha sonra Tariyel Qasımov bu şəraitlə razılaşmadığını bildirərək birnəfərlik otağa keçirilməsini tələb edib. Sanatoriyanın inzibati heyəti tərəfindən ona bildirilib ki, bu dəyişiklik yalnız yollayış sənədinin dəyişdirilməsi əsasında həyata keçirilə bilər. Həmçinin qeyd olunub ki, hazırda sanatoriyada bütün otaqlar tam doludur və belə bir dəyişiklik indiki halda mümkün deyil. Bundan əlavə, hörmətli Tariyel Qasımov sanatoriyada olduğu müddətdə tibbi prosedurlara davamlı olaraq qatılmayıb, həkimlərin tövsiyələrinə əməl etməyib və daxili nizam-intizam qaydalarına səthi yanaşıb. Diqqətinizə çatdırırıq ki, bu hal sanatoriyanın müalicə və reabilitasiya rejiminə uyğun gəlmir. Bir daha bildiririk ki, “Bilgəh” kardioloji sanatoriyasında göstərilən xidmətlər bütün pasiyentlərə bərabər əsaslarla, yollayış sənədlərində nəzərdə tutulmuş qaydalara uyğun şəkildə təqdim olunur”.
