Görkəmli aktyor, Xalq artisti Həsənağa Turabovun qızı Sevinc Turabova qardaşının qətlindən danışıb.
Kulis.az-a müsahibə verən Sevinc Turabova deyib ki, Siyəzən polis şöbəsinin əməliyyat müvəkkili olmuş Daşqın Turabov 7 mart 1997-ci ildə Bakıya gəlib:
“Daşqın 7 martda Bakıya gəldi. Bizi 8 Mart münasibətilə təbrik elədi. 17 mart mənim ad günümdür. İndiyə qədər özümü bağışlaya bilmirəm. Mənə dedi ki, istəyirsən, getməyim, ad gününü qeyd edək, sonra gedim. Dedim ki, yox, o vaxta qədər niyə gözləyirsən? Get, sonra gələrsən. Kaş deyərdim ki, getmə. Onu güllə ilə vurmuşdular. Mən "getmə" desəydim, sağ qalacaqdı.
Hamı deyir ki, alın yazısıdır, olacağa çarə yoxdur, ancaq yenə də beynimdə ilişib qalıb. Martın 7-si təbrik elədi, getdi. 9-undan 10-na keçən gecə zəng gəldi. Dedilər ki, Siyəzəndəndir, Daşqını vurublar. Hamımız bir-birimizə baxdıq. Atam gəldi, ona da dedik. Hamımız şokda idik. Axı biz onunla neçə dəfə danışmışdıq. Çaşıb qaldıq. Atam tez dostlarına zəng elədi. Kamal Abdulla, Vaqif İbrahimoğlu gəldi. Sonra öyrəndik ki, Daşqını, doğrudan da, vurublar. Dedilər ki, yaralanıb, həkim gətirin. Onda atam sakitləşdi ki, deməli, sağdır. Elə təzəcə həkim danışmaq üçün dostları ilə evdən çıxırdı, xəbər gəldi ki, Daşqın keçinib. Tabutunu evə gətirənə qədər sağ olduğuna inanırdım. Biz 14-cü mərtəbədə qalırdıq. Aşağı düşənə qədər saçım ağardı. Hamı mənə baxırdı. Güzgüyə baxanda gördüm ki, saçım ağappaq olub”.
Turabova bildirib ki, indi Daşqının nəvəsi var: “Sadəcə, həyatda heç kim heç kimin yerini vermir. O məni ana kimi istəyirdi. Daşqın məndən doqquz yaş böyük idi. Mən ona atam kimi baxırdım”.
O söyəlyib ki, Daşqının qətlindən sonra Həsənağa Turabovun vəziyyəti pisləşib: “Atama çox pis təsir elədi. Daşqının ölüm xəbəri gələndə dayandı, divara baxdı, baxdı, baxdı. Əlini üç dəfə vurdu divara. Acizlikdən... "Heç nə eləyə bilmədim, kömək eləyə bilmədim oğluma", - dedi. Gəldi oturdu divanda. Bir nöqtəyə zilləndi. O nöqtəyə baxandan sonra atam tamam dəyişdi. Ürək xəstəliyi tapdı, vəziyyəti ağırlaşdı”.
Xalq artistinin qızı qatili bağışlamadığını sözlərinə əlavə edib: “…iş kəsildi (qatili nəzərdə tutur-red.) Nə olsun, artıq buraxıblar. Müsahibələr verib. “TikTok”da görmüşəm…. Onu heç vaxt bağışlamayacağam. O, bu ailəni dağıtdı. Bəlkə də, Daşqın ölməsəydi, atam nə qədər yeni kinolara çəkiləcəkdi. Gözəl rolları olacaqdı. Onun ölümü ilə sanki Turabovlar ailəsini öldürdülər. İndi də Turabovlardan bir-iki nəfər qalıb”.
