Xalq artisti Ənvər Həsənovun qəbirüstü abidəsi hələ də düzəltdirilməyib.
Bu barədə teleqraf.az-a açıqlamasında Ənvər Həsənovun qızı Aytən Həsənova bildirib.
Onun sözlərinə görə, abidənin hazırlanmaması maliyyə problemi ilə əlaqədardır: "Mədəniyyət Nazirliyi bildirdi ki, maliyyə baxımımdan buna gücləri çatmır. Azərbaycan Kinematoqrafçılar İttifaqının sədri Xalq artisti Rasim Balayev 700 manat göndərdi. Bu məbləğ kifayət etmədi. Gözləyirəm ki, bu pulun üzərini nə vaxt düzəldə biləcəyəm".
Aytən Həsənova deyib ki, qəbirüstü abidə üçün üç min manat lazımdır, onun özünün isə buna imkanı yoxdur: "İşləmirəm, səhhətimdə problemlər var. Oğlum Murad yalnız evin xərclərini qarşılayır. İlk gündən Kinostudiyaya, Mədəniyyət Nazirliyinə və atamın dostlarına müraciət etdim ki, mənə kömək eləsinlər, ən azından atamın hörməti üçün. Amma heç kimdən kömək gəlmədi".
Xalq artistinin qızı bildirib ki, mərhum atasının sənət dostlarından yalnız Ötkəm İsgəndərov, Cəmil Quliyev tez-tez zəng edirlər: "Başqa heç kim. Atamın yaxın dostları indi yanımızda deyil".
Aytən Həsənova avqustun 17-də Ənvər Həsənovun doğum günü onun qəbrini ziyarət edə bilməyib: "İnanın, utandığımdan qəbrini ziyarət edə bilmədim, çünki qəbirüstünü düzəldə bilməmişdim".
Qeyd edək ki, 1950-ci il təvəllüdlü Ənvər Həsənov bu il martın 16-da uzun sürən xəstəlikdən vəfat edib.
O, Buzovna qəbiristanlığında həyat yoldaşının yanında dəfn olunub.
