Xəbər verdiyimiz kimi, aktrisa Çimnaz Sultanova yanvarın 15-də dünyasını dəyişib.
Aktrisanın məşhurlaşdığı "Vicdan haqqı" serialında tərəf müqabili olduğu aktyor Elxan Yunis "Unikal"a açıqlamasında bildirib ki, o da bu barədə məlumatı çəkiliş zamanı alıb: "Biz ancaq çəkiliş meydançasında görüşürdük. Bu dəqiqə soruşsanız, heç onun yaşını deyə bilmərəm.
O serialdan sonra mən də, o da ayrı-ayrı yerlərdə çəkilişlərdə olmuşuq, heç bir əlaqəmiz olmayıb. Xəbəri az öncə eşitdim. Rəhmətə gedibsə, çox heyf! Həqiqətən çox pis oldum. Allah rəhmət eləsin!"
Aktyor Çimnaz Sultanovanın xəstəliyi ilə bağlı verilən suala da cavab verib: "Bir dəfə eşitməmişəm o desin ki, xəstəyəm, ağrıyıram və s. Həmin vaxtlar elə bir şey yox idi. Xəstə olsaydı, çəkilişlərə gəlməzdi. Mən xəstə olsaydım, bu barədə tərəf müqabilimə deməzdim axı. Yəqin o da deməzdi".
Aktrisa Sonaxanım Əliyeva isə bildirdi ki, Çimnaz Sultanova ilə yaxın əlaqələri olub: "Daim dostluq münasibətlərimiz olub. Mən onun heç bir xəstəliyi haqqında eşitməmişəm, heç özü də şikayətlənməyib. Mən inanmaq istəmirəm ki, ona nəsə olub. Çünki o, həmişə həyat eşqi ilə yaşayıb, həyat dolu bir xanım olub. Sonuncu dəfə bir neçə ay əvvəl əlaqə saxlamışıq. Novxanıda bağ evinə köçmüşdü, mənim də serial çəkilişlərim var. Ona görə başımız bir az qarışıq idi. Bildiyiniz kimi, bu gün həm də onun ad günüdür".
Aktrisa həmçinin qeyd edib ki, Ç.Sultanova dostlarına belə öz yaşını açıqlamayıb: "Heç birimizə deməyib. Bu günə qədər onun şəxsiyyət vəsiqəsini belə görə bilməmişik. O, oğlunu Almaniyaya göndərmişdi, atası ilə Almaniyada yaşayır. O, oğlu ilə nəfəs alırdı. Ona görə Çimnaz Almaniyaya gedib-gəlirdi".
