"Keçən ildən fərqli olaraq bu il özümü yaxşı hiss etmirəm. Səhhətimdə problemlər var. Bu da əsəblə əlaqəlidir"
Bu sözləri "Ovçu Pirim" obrazı ilə məşhurlaşan aktyor Allahverdi Yolçuyev Bakuplus.az-ın əməkdaşı ilə söhbətində deyib.
Uzun illərdir Parkinson xəstəliyindən əziyyət çəkən 66 yaşlı sənətçi bildirib ki, əsəb onun nitqinə də təsir edib: "Gündəlik həyatda əsəbiləşməmək olmur. Bu da öz növbəsində xəstəliyimin irəliləməsinə yol açıb. Bütün xəstəliklərin mənbəyi əsəbdir. Əsəb mənim nitqimə də təsir edib. Əgər müalicələr olsa hər şey qaydasına düşəcək. Ayda bir və ya iki dəfə həkim müayinəsinə gedirəm. Xəstəliyimlə bağlı hazırda dərman qəbul etmirəm. Özümü dərmana öyrəşdirmək istəmirəm. Amma vaxtı ilə dərman çox içmişəm".
Sənətçi çətin günlərində həmkarlarının onu diqqətdən kənarda qoymadığını deyib:"Həmkarlarım mütəmadi zəng edir, vəziyyətimi soruşur, müxtəlif tədbirlərə dəvət edirlər. Bir sözlə, məni tək buraxmırlar". Bir müddət əvvəl dərmanlarını almaq üçün küçədə corab satması ilə gündəmə gələn aktyor hazırda da işsiz olduğunu bildirib. O, bu məsələ ilə bağlı ətraflı danışmaq istəmədiyini qeyd edib.
