Abşeron rayonunun Xırdalan şəhərində 39 yaşlı Ülviyyə qayınanası Zəhra (adlar şərtidir) ilə mübahisə edib və ona xəsarət yetirib.
Hadisə Zərdabi küçəsindəki evdə baş verib. Zəhranın Ülviyyənin həmin evdə onunla birgə yaşamasını istəməməsi və bu barədə narazılığını bildirməsi tərəflər arasında mübahisəyə səbəb olub. Buna əsəbiləşən Ülviyyə qayınanasının üzərinə hücum edərək əl və yumruq zərbələri ilə onun sifətinə, qoluna və bədəninin müxtəlif nahiyələrinə vurub.
Məhkəmədə Ülviyyə əməlini etiraf edib. O bildirib ki, həyat yoldaşı Fazillə 2008-ci ildən qeyri-rəsmi, 2026-cı ilin mayından isə rəsmi nikahda yaşayır. Onların bir övladı var.
Məhkəmə araşdırması zamanı gəlinlə qayınananın barışdığı məlum olub. Zəhra gəlini bağışlayaraq ondan şikayət və tələbinin olmadığını bildirib.
Abşeron Rayon Məhkəməsinin hökmü ilə Ülviyyə cinayət məsuliyyətindən azad edilib və işə xitam verilib.
mənbə: demokrat.аz
