Xırdalan şəhərində, AAAF Park yaşayış kompleksində 36 yaşlı kişi qeyri-rəsmi münasibətdə olduğu qadına xəsarət yetirməkdə təqsirləndirilib.
Ağsu rayon sakini, 1990-cı il təvəllüdlü Seymur uşaqlarının maddi təminatı ilə bağlı yaranan mübahisə zamanı Nərminənin (adlar şərtidir – red.) başına, boynuna və qarın nahiyəsinə yumruqla zərbələr endirib.
Zərərçəkmiş ifadəsində hadisə zamanı hamilə olduğunu, Seymurun bunu bildiyi halda ona zərbələr vurduğunu bildirib. Onun sözlərinə görə, hadisəni avtomobildə olan oğlu da görüb. Qadın xəsarətlərinə görə 7 gün xəstəxanada müalicə aldığını deyib.
Nərminə bildirib ki, Seymur hamiləlik dövründə ona maddi yardım göstərməkdən imtina edib, hətta uşağı dünyaya gətirəcəyi halda sığınacağa verməsini tələb edib.
Seymur isə ittihamı qəbul etməyib. O, qadını vurmadığını, aralarında pul məsələsinə görə mübahisələr yarandığını bildirib və bəraət istəyib.
Abşeron Rayon Məhkəməsinin hökmü ilə Seymur 3 ay 28 gün müddətinə azadlıqdan məhrum edilib.
mənbə: demokrat.az
