Xırdalan sakinləri ictimai nəqliyyat çatışmazlığından narazıdır.
Bakuplus.az-a müraciət edən şikayətçinin sözlərinə görə, şəhərdə avtobusların azlığı və köhnə vəziyyəti səbəbindən işə və dərsə vaxtında çatmaq demək olar ki, mümkün deyil.
4-cü kurs tələbəsi olan gənc saytımıza bildirib ki, hər səhər Mirzə Ələkbər Sabir küçəsindəki ("Dəyirman yolu" adlanan ərazi) dayanacaqda avtobus gözləmək səhrada qar gözləməyə bənzəyir.
"119, 135, 515 nömrəli avtobuslar qapıları belə bağlanmayacaq qədər dolu gəlir. İki üzbəüz 16 mərtəbəli bina var, bu qədər insan səhər nə işə, nə də dərsə gedə bilir. Dayanacaq var, amma avtobus yoxdur," – deyə tələbə bildirir.
Onun sözlərinə görə, avtobuslar çox vaxt köhnə olduğundan tez-tez sıradan çıxır, yolda qalır. Bu səbəbdən sakinlər ya 15-20 dəqiqə piyada digər dayanacaqlara getməli olurlar, ya da 2 manatlıq taksilərə müraciət edirlər:
"Xırdalan avtobusları istənilən saatda səbir daşıran hərəkətlər edir. Sıxlıq az olanda gec gəlirlər, sıxlıq çox olanda isə bəzi dayanacaqlarda ümumiyyətlə dayanmırlar".
Sakinlər bildirir ki, bu ərazidə əhalinin sayı artdığı halda, nəqliyyat vasitələrinin sayı eyni qalıb. Onların fikrincə, ən azından az yüklənən xətlərdən avtobuslar bu istiqamətə yönləndirilməli, köhnə nəqliyyat vasitələri yenilənməlidir.
Şikayətçi gənc tələbə həmçinin Xırdalanda "işıqfor qıtlığı" problemini də vurğulayıb:
"Xırdalan dairəsindən sonra ilk işıqfor Abşeron Rayon Mədəniyyət Mərkəzinin qarşısındadır. Bu iki nöqtə arasında 3 km məsafə var və 12 piyada keçidi. İnsanlar yolu keçmək üçün "dua etməli" olurlar. Sanki şəxsi avtomobilin aşının yoxdursa, evdən çıxmamalısan."
Sakinlər aidiyyəti qurumlardan Xırdalanda ictimai nəqliyyat və yol təhlükəsizliyi məsələlərinə ciddi diqqət ayrılmasını tələb edirlər.
