Müslüm Maqomayev adına Azərbaycan Dövlət Akademik Filarmoniyası kamera və orqan musiqisi zalında Alman-Azərbaycan Cəmiyyətinin dəstəyi ilə Xocalı faciəsinin 32-ci ildönümünə həsr olunmuş tədbirlər çərçivəsində tamaşaçını tariximizin faciəli səhifələrindən birinə — 1941-ci ilə aparan antrepriz tamaşa nümayiş etdirilib.
Bakuplus.az xəbər verir ki, səhnə işi bizi azərbaycanlı almanların yaşadığı Annenfeld kəndinə aparır. Moskvadan verilən əmrlə alman əsilli təxminən min nəfər sakinin gizli şəkildə Qazaxıstan ərazisində yerləşən ən iri düşərgələrdən biri olan Karlağa deportasiyası planlaşdırılır. Onları ən ağır sınaq gözləyir — tale, seçim və insanın əlindən heç nə gəlmədiyi məqamda ləyaqətini necə qoruması…
Tamaşanın müəllifi və quruluşçu rejissoru Ajdar Ulduz söyləyib ki, onun üçün əsas məqsəd tarixin siyasi yox, insani tərəfini göstərmək olub.
"İstəyirəm ki, tamaşaçı sadəcə baxıb çıxmasın, düşünsün. Deportasiya tarixi bizim ümumi yaddaşımızın bir hissəsidir. Xocalı və digər faciələr haqqında danışarkən unutmamalıyıq ki, hər bir faciənin mərkəzində insan dayanır. Rəqəmlər və sənədlər yox, canlı talelər", — deyə Ajdar Ulduz bildirib.
Tamaşada Xocalı soyqırımı ilə 1941-ci ildə almanların deportasiyası arasında əlaqə birbaşa ifadə olunmasa da, bu, emosional müstəvidə aydın hiss edilir.
