Ötən gecə güclü yanğının baş verdiyi Yasamaldakı çoxmərtəbəli yaşayış binasının sakinləri arasında tanınmış hərbi jurnalist Heydər Mirzə də olub.
Bakuplus.az xəbər verir ki, o, hadisə zamanı dostu ilə birlikdə 12-ci mərtəbədə yerləşən mənzilində olub.
Yanğın anından video paylaşan jurnalist mənzilə hər dəlikdən tüstü daxil olduğunu, 4-cü mərtəbəyə qədər düşə bildiklərini, lakin yenidən çətinliklə evə qayıtmaq məcburiyyətində olduqlarını söyləyib.
Bundan əlavə, o, 3 nəfərin ölümü, bir çox şəxsin zəhərlənməsi ilə nəticələnən yanğına görə binanın altında yerləşən "LOFT" restoranını ittiham edib. Heydər Mirzə güclü tüstü ilə müşayiət edilən hadisəyə restoranın səbəb olduğunu iddia edib. Onun sözlərinə görə, hadisə vaxtı yanğın olmayıb, binanın şaxtasından güclü tüstü yayılıb və tikilinin dəhlizlərini bürüyüb.
Qeyd edək ki, hadisə ilə əlaqədar müvafiq qurumlar tərəfindən araşdırmalar aparılır.
