Torpaqlarımız 30 il ərzində düşmən tapdağı altında qaldı. Müzəffər ordumuz sentyabrın 27-dən noyabrın 10-dək Qarabağda apardığı uğurlu əks-hücum əməliyyatları sayəsində böyük Zəfər qazandı.Vətən müharibəsi təkcə döyüş meydanında deyil, insanların yaddaşında da dərin izlər qoydu. O günlərdə hər kəs öz payına düşəni etdi — kimisi silahla, kimisi sözlə, kimisi səslə. Həmin igidlərdən biri də xanəndə Məbud Əhmədov idi. Döyüşdə yaralanmış, amma ruhdan düşməmişdi. Əməliyyat masasında belə oxuduğu mahnı ilə həm döyüş yoldaşlarına, həm də xalqına güc verdi. Bakuplus.az-ın əməkdaşı onunla həmin günlərin unudulmaz xatirələrindən və bu günə qədər daşıdığı hisslərdən danışıb.
- Məbud bəy, sizi həm müğənni, həm də müharibə iştirakçısı kimi tanıyırıq. Hər ikisi çox fərqli hisslər tələb edir. Bu gün özünüzü daha çox hansı qismdə görürsünüz — sənət adamı kimi, yoxsa o günlərin döyüşçüsü kimi?
- Mənim üçün hər ikisi – həm müğənni, həm də müharibə iştirakçısı olmaq həyatımın ayrılmaz hissələridir. Amma bu gün özümü daha çox sənət adamı kimi görürəm, çünki o döyüş günlərində qazandığımız qələbəni indi səhnədə, musiqi ilə yaşadıram.
- Dinləyicilərinizin sizdə ən çox sevdiyi xüsusiyyət nədir?
- Düşünürəm ki, dinləyicilərim məndə ən çox səmimiyyəti və səsimin duyğusunu sevirlər. Mən oxuyanda çalışıram ki, təkcə mahnı yox, hisslərim də səsə qarışsın.
- Yeni layihələr, duetlər və ya mahnılar planlaşdırırsınızmı?
- Bəli, yeni layihələr üzərində işləyirəm. Bir neçə yeni mahnı və duet planım var. Mövzular həm vətənpərvərlik, həm də sevgi üzərində olacaq. Hər iki istiqamətdə öz sözümü demək istəyirəm.
- Hansı mövzularda oxumağı daha çox sevirsiniz və niyə?
- Vətən mövzusunda oxumağı çox sevirəm. Çünki o hisslər mənim içimdədir — yaşadığım, gördüyüm, keçirdiyim anlar. Hər dəfə belə mahnı oxuyanda sanki yenidən o günlərə qayıdıram.
- Səhnə və şəxsi həyat arasında balans saxlamaq çətin olurmu?
- Əslində, asan deyil. Səhnə daim enerji, insanlar, tədbirlər deməkdir, şəxsi həyat isə sakitlik istəyir. Amma sevdiyim işi gördüyüm üçün bu balansı qorumağa çalışıram.
- Yaralı halda "Qarabağ" mahnısını ifa etməyiniz bir çox insanın yaddaşına həkk olunub. Həmin anı siz necə xatırlayırsınız?
- "Qarabağ" mahnısını yaralı halda ifa etdiyim an… Həmin hissi sözlə ifadə etmək çətindir. Ağrı da var idi, qürur da. Amma o an mən tək deyildim — xalqımın nəfəsini hiss edirdim.
- Yaralı bir qazinin səslənəndirdiyi "Qarabağ" mahnısının xalqda yaratdığı təsiri necə qiymətləndirirsiniz?
- Xalqın bu mahnıya verdiyi dəyər mənim üçün ən böyük mükafatdır. İnsanlar o səsi bir qazinin ürəyindən gəldiyi üçün sevdi. Bu, təkcə mahnı yox, bir xatirədir, bir rəmzdir.
- Müharibə qazisi kimi bu gün Qarabağda quruculuq və həyatın bərpasını görmək sizdə hansı hissləri yaradır?
- Qarabağda bu gün yenidən həyatın bərpa olunduğunu görmək məni həm kövrəldir, həm də sevindirir. Biz o torpaqlarda döyüşdük, indi isə insanların orada yaşamasını, gülməsini görmək qələbənin həqiqi mənasıdır.
- Döyüş meydanında olduğunuz günləri bir sözlə ifadə etməli olsanız, o söz nə olardı?
- Döyüş günlərini bir sözlə desəm – Qürur. O günlərdə hamımız Vətənin nəfəsi idik.
- Müharibədən sonra həyata baxışınızda nə dəyişdi?
- Müharibə mənim həyata baxışımı tam dəyişdi. İndi hər şeyə daha çox dəyər verməyi, həyatın hər anını şükürlə yaşamağı öyrənmişəm.
Nəzrin Vahid
