Bakının Xətai rayonunda 28 yaşlı oğlan qohumunun evindən oğurluq edib.
1998-ci il təvəllüdlü Əli İmanov xalası Gülərin Xətai rayonundakı mənzilinin giriş qapısını nənəsinin gödəkçəsinin cibindən götürdüyü açarla açıb, 8000 manat nağd pulu oğurlayıb.
Əlinin barəsində Cinayət Məcəlləsinin müvafiq maddələri ilə ittiham elan edilib.
İş üzrə izahatında Əli özünü təqsirli bilib, ifadəsində göstərib ki, 2026-cı il fevral ayının əvvəllərindən nənəsi Əminə və xalası Güllərin yanına gedib, onlarda yaşayıb.
Təqsirləndirilən şəxs qeyd edib ki, hadisə günü saat 11 radələrində o, nənəsi və xalası uzaq qohumlarının Badamdar qəsəbəsindəki hüzr yerinə gediblər. O nənəsi və xalasını hüzr yerində qoyub taksi ilə evə qayıdıb. Məqsədi xalasının pullarını oğurlamaq olub.
Əli bildirib ki, 8000 manatı götürdükdən sonra Badamdar qəsəbəsinə, hüzr yerinə gedib. O sonradan oğurladığı pulları şəhərdə içkiyə və müxtəlif əyləncələrə xərcləyib.
Təqsirləndirilən şəxs ifadəsinin sonunda əməlindən peşman olduğunu, dəymiş ziyan tamamilə ödəndiyini və zərərçəkmiş şəxslə barışdığını deyib.
Xətai Rayon Məhkəməsinin hökmü ilə Əli 1 il 11 ay 26 gün müddətə azadlığın məhdudlaşdırılması cəzasına məhkum edilib.
Mənbə: teleqraf.az
