Bakıda ictimai nəqliyyatla bağlı daha bir narazılıq qeydə alınıb.
Bakuplus.az xəbər verir ki, bu barədə jurnalist Elnurə Abuşova sosial media hesabında paylaşım edib.
O bildirib ki, sərnişinlər 71 nömrəli avtobusla "28 may" metrostansiyası yaxınlığından 6-cı mikrorayona qədər çox çətinliklə gediblər:
"Allahı çağıra-çağıra gəldik. Axırı avtobus dilə gəldi, dedi: "Xaliq Faiqoğlu" MMC rəhbəri nasazlığı aradan qaldırmasa, 1 addım atmaram. Əvvəllər avtobusa nəsə olanda növbəti avtobusla pulsuz yola salırdılar. İndi qiymət artandan bunu da etmirlər. Ötən həftə də "20 yanvar" dairəsində qapısını vurdular, düşdük. Bəlkə kimsə son pulunu verib minib. Yolda qalmalıdır? Hanı müştəri hüququ?".
Vətəndaş həmçinin Antiinhisar və İstehlak Bazarına Nəzarət Dövlət Agentliyinə müraciət edərək məsələni araşdırmağa çağırıb.
Qeyd edək ki, son dövrlərdə sosial şəbəkələrdə bu kimi şikayətlər tez-tez yayılıb.
