Bakı Ağır Cinayətlər Məhkəməsində xüsusi amansızlıqla qətl törətməkdə təqsirləndirilən lənkəranlı İgid Rəcəbzadənin cinayət işinin bəzi detalları məlum olub.
Pravda.az xəbər verir ki, ittihama görə, hadisə 2024-cü il dekabrın 17-də paytaxtda, Maştağa–Zabrat şosesinin Zabrat dairəsi istiqamətində yerləşən körpünün yaxınlığına baş verib.
Belə ki, İgid Rəcəbzadə münasibətdə olduğu Lənkəran sakini Elnarə İbrahimova ilə onun işlədiyi kafedə görüşüb. Onlar birlikdə taksi ilə sözügedən körpünün yaxınlığına gediblər.
Avtomobildən düşdükdən sonra tərəflər arasında mübahisə yaranıb. Təqsirləndirilən şəxsin zor tətbiq etdiyini görən zərərçəkmiş şəxs bacısına zəng edərək kömək istəsə də, İgid hərəkətlərini davam etdirib.
İttihamda qeyd olunur ki, Elnarənin onun ünvanına nalayiq ifadələr işlətməsi təqsirləndirilən şəxsi daha da aqressivləşdirib. Bu səbəbdən o, daşla Elnarənin başına zərbələr endirib. Nəticədə Elnarə müxtəlif dərəcəli ağır bədən xəsarətləri alıb və bu zərərçəkmiş şəxsin ölümü ilə nəticələnib.
Beləliklə, İgid Rəcəbzadənin əməli Cinayət Məcəlləsinin xüsusi amansızlıqla qəsdən adam öldürmə maddəsi ilə tövsif edilib.
Məhkəmənin hökmü ilə İgid Rəcəbzadə 17 il müddətinə azadlıqdan məhrum edilib.
