Azərbaycan Futzal Federasiyasının (AFF) prezidenti Zaur Axundovun ev dustaqlığında saxlanılma müddəti uzadılıb.
Qafqazinfo.аz-ın əldə etdiyi məlumata görə, Bakı Hərbi Məhkəməsi prokurorun təqdimatı əsasında belə qərar çıxarıb.
Hakim xüsusilə külli miqdarda yeyintidə ittiham olunan şəxsin istintaqdan yayınma ehtimalının qarşısının alınması məqsədilə təqdimatı təmin edib.
Qərara əsasən, Axundovun yaşayış yerini məhdudlaşdıran ev dustaqlığı qətimkan tədbirinin uzadılmasına qərar verilib.
Qeyd edək ki, Z.Axundov Cinayət Məcəlləsinin 179.4-cü ( mənimsəmə-xüsusilə külli miqdarda zərər vurmaqla törədildikdə) maddəsi ilə ittiham olunur. Onun "Araz-Naxçıvan" futbol klubunun rəhbəri olan qardaşı Ramin Axundov isə 5 milyonluq siqaret qaçaqmalçılığı ilə bağlı aparılan cinayət işi üzrə axtarışdadır. O, ölkədə olmadığından tutulması mümkün olmayıb. Qardaşların ikisinin də cinayət işi Baş Prokuror yanında Korrupsiyaya qarşı Mübarizə Baş İdarəsində aparılır.
