Abşeron rayonu, Xırdalan şəhəri "AAAF Park" yaşayış kompleksində sakinlər obrazlı şəkildə desək, zibilə düşüblər.
Bakuplus.az-a müraciət edən sakinlərin sözlərinə görə, yaşayış kompleksində məişət tullantılarının qalaqlanması ciddi antisanitar vəziyyət yaradıb. Xüsusilə yay aylarında pis qoxu və milçək əlindən dayanmaq olmur.
Vətəndaşların sözlərinə görə, zibil konteynerlərinin azaldılması vəziyyəti daha da ağırlaşdırıb.
Məsələyə yaşayış kompleksinin balaca sakinləri də diqqət çəkməyə çalışıblar. Onlar "AAAF Park"ın rəhbəri Tofiq Heydərova ünvanladıqları plakatlarla etirazlarını ifadə ediblər. Uşaqların hazırladığı plakatlarda "Tofiq əmi, təbiəti qoruyaq. Zibili buradan götürün", "İtlər zibilliyə hücum edir", "Zibili götürün ki, rahat oynayaq" kimi çağırışlar yer alıb.
Sakinlər problemin qısa zamanda aradan qaldırılmasını və ərazidə mütəmadi zibil daşınmasının təmin olunmasını istəyirlər.
Məsələ ilə bağlı "AAAF Park" yaşayış kompleksi ilə əlaqə saxladıq. Bildirildi ki, sözügedən ərazidə zibil konteynerləri sanitar və normativ qaydalara uyğun yerləşdirilib:
"Sakinlərin əsas məqsədi odur ki, o zibil konteynerləri oradan götürülsün. Bu isə qeyri-mümkündür. Hər binadan 25-30 metr uzaqlıqda zibil qabı qoymuşuq. Həmin zibil konteynerləri həm üst, həm də yan tərəfdən qapalı şəkildə yerləşdirilib. Sadəcə bir gün - dünən zibil maşını gec gəldiyi üçün zibil konteynerləri dolub, ətrafa yayılıb. Ancaq daha sonra həmin ərazi tam yuyulub və dezinfeksiya edilib".
Kompleksin məsul şəxsi qeyd etdi ki, sakinlərin alternativ fikirləri varsa, razılaşa bilərlər.
"Ortaq məxrəcə gəlmək istəyirik. Hara desələr, ora qoyarıq. Amma bilirlər ki, alternativ variant yoxdur. Həmin küçədəki bir neçə sakinin 300-400 manat kommunal borcları var. Onlar da buna görə belə vəziyyət yaradırlar. Zibilin daşınması ilə bağlı "Abad Abşeron"la 7 min manata yaxın məbləğdə müqavilə bağlamışıq. Bu pulu haradan ala bilərik? Binaların saxlanılması, blokların işıqlandırılması - hamısını sakinlərdən yığılan kommunal pullarla ödəyirik. Bəzi sakinlər də illərlə pul ödəmirlər, belə üsullara əl atırlar", - deyə "AAAF Park" yaşayış kompleksindən bildirilib.
