Yay fasiləsində "Zirə"dən ayrılaraq Almaniyanın III Liqa təmsilçisi "Valdhof Manhaym"a transfer olunan Leroy Mikels müsahibə verib.
31 yaşlı almaniyalı hücumçu Azərbaycanda keçirdiyi 2 il, "Zirə"dən ayrılmasının səbəbləri, "Neftçi"yə transferinin baş tutmaması, qardaşı Coy-Lens Mikelsin "Sabah"dakı çıxışı və gələcək planları barədə danışıb.
O, "Zirə"də davam etməməyinizin əsas səbəbi nə oldu?" sualına belə cavab verib: "Əsas səbəb o idi ki, məndən necə istifadə etməyi bilmirdilər. Mənim əsas mövqeyim sol cinahdır, amma demək olar ki, həmişə hücumçu kimi oynayırdım. Sol cinahda çıxış edəndə komandaya həmişə xüsusi nəsə verirdim. Bunu Ruanda milli komandasında da göstərdim. Öz mövqeyimdə oynadım, iki qol vurdum və oyunun ən yaxşı futbolçusu seçildim. Sonra "Zirə"yə qayıtdım, sol cinahda oynayıb qol vurdum, amma yenə məni hücumçu kimi oynatdılar. Bunun heç bir mənası yox idi".
Mikels bildirib ki, "Zirə"dəki mühit də o qədər yaxşı olmayıb: "İnsan özünü rahat hiss etmirdi. Komandanın futbol üslubu isə çox passiv, statik və robotik idi. Amma əminəm ki, öz mövqeyimdə oynasaydım, "Zirə" turnir cədvəlində daha yuxarı yerlərdə olardı. Təəssüf ki, hər şey istədiyim kimi alınmadı".
Futbolşu deyib ki, "Neftçi"ni çox bəyənir: "Neftçi"ni çox bəyənirəm. Klubun idman üzrə müşaviri Kamil Məmmədovla da yaxşı münasibətlərim var. Amma bəzən klubun başqa planları olur və buna hörmətlə yanaşmaq lazımdır. Maliyyə məsələsi deyildi. Sadəcə, klubda yalnız bir nəfərin səni istəməsi kifayət etmir. Transferin baş tutması üçün bütün klubun buna inanması və dəstəkləməsi lazımdır. Təəssüf ki, elə olmadı".
Mikels "Qardaşınız Coy-Lens "Sabah"dan ayrılıb xaricə getsə də, karyerası alınmamış və yenidən "Sabah"a qayıtmışdı. Onun legioner təcrübəsi qərarınıza təsir etdi?" sualına isə belə cavab verib: "Hər kəsin öz yolu var. Əlbəttə, onunla bu barədə danışırıq. Amma sonda özümlə bağlı qərarı özüm verirəm. O isə hər zaman məni dəstəkləyir".
Mənbə: teleqraf.az
