2026-cı ilin gəlişinə az qalmış cəmiyyətdə yeni ilə dair ümid və gözləntilər daha da artır. Yeni ilin yaxınlaşması təkcə təqvim dəyişikliyi deyil, eyni zamanda cəmiyyətin psixoloji durumunun göstəricisi kimi dəyərləndirilir. İnsanlar bu dövrdə gələcəklə bağlı daha çox düşünür, baş verəcək prosesləri öncədən anlamağa çalışırlar. Məhz bu axtarışlar fonunda 2026-cı ilin astanasında ekstrasenslərin səsləndirdiyi proqnozlar geniş maraq doğurur.
Ekstrasens Zirəddin Rzayev Bakuplus.az-a açıqlamasında 2026-cı ili "hiyləgər və avantürist il" kimi xarakterizə edib. Onun sözlərinə görə, bu ildə 2027-ci ildə baş verə biləcək müharibələrin bünövrəsi qoyulacaq: "2026-cı il siyasətçilərin ilidir. Bu il olduqca həssas dövr hesab olunur. Böyük müharibələr olmayacaq, lakin gələcək münaqişələrin əsası məhz bu ildə formalaşacaq. Bu il çoxbilmişlər və hiyləgərlər qazanacaq. Avam olmamaq lazımdır".
Z.Rzayev qeyd edib ki, 2026-cı ildə Azərbaycanda böyük fəlakətlərin yaşanması gözlənilmir:"2027-ci il daha uğursuz olacaq. Ukrayna və Rusiya arasında atəşkəs mümkündür, lakin razılaşmalar uzun illər çəkə bilər. Şərqdə baş verən proseslərin təsiri bölgəmizdə də hiss olunacaq. 2026-cı ildə sülh müqaviləsinin imzalanması real görünür".
Ekstrasens əlavə edib ki, 2026-cı il geosiyasi hadisələrlə və təbii proseslərlə yadda qalacaq. Onun proqnozlarına görə, Ukraynanın taleyi və sülh sazişi məsələsi əsasən 2026–2027-ci illərdə həllini tapacaq. İranda gərginliyin artacağı ehtimal edilsə də, bunun genişmiqyaslı müharibəyə çevrilməyəcəyi bildirilir. Rusiya–Azərbaycan münasibətlərində isə ciddi gərginlik gözlənilmir.
Z.Rzayev 2026–2027-ci illərdə Zəngəzur dəhlizinin açılması ehtimalının da mövcud olduğunu vurğulayıb.Bununla yanaşı, ekstrasens 2025 və 2026-cı illərdə dünyada sunami ehtimalının yüksək olduğunu, 2030-cu ilə qədər isə planetin görünməmiş təbii fəlakətlərlə — zəlzələlər və vulkan püskürmələri ilə üzləşə biləcəyini iddia edib.
Qeyd edək ki, 2026-cı il Şərq təqviminə görə At ili hesab olunur və bu ilin dinamik, enerjili və dəyişikliklərlə zəngin keçəcəyi gözlənilir.
Əsmər Sənani
