Bakının Sabunçu rayonunda 40 yaşlı kişi həyat yoldaşına xəsarət yetirib.
Hadisə Sabunçu qəsəbəsi, Q. Vəzirov küçəsində yerləşən nömrəsiz ünvanda baş verib.
Lənkəran rayon sakini, 1986-cı il təvəllüdlü Təhməz həyat yoldaşı Süsənlə (adlar şərtidir – red.) mübahisə edib. O, yaşadıqları evin qonaq otağında həyat yoldaşı Süsənin onunla kobud danışması səbəbindən aralarında yaranmış mübahisə zamanı qəsdən yumruqla onun sol qol nahiyəsinə bir dəfə vuraraq, müxtəlif dərəcəli bədən xəsarətləri yetirib.
Faktla bağlı Təhməzə qarşı Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham irəli sürülüb.
Məhkəmə araşdırması zamanı məlum olub ki, təqsirləndirilən şəxs zərərçəkmiş şəxslə barışıb. Buna görə də zərərçəkmiş qadın ərini bağışlayıb və ona qarşı şikayətini geri götürüb.
Sabunçu Rayon Məhkəməsinin hökmü ilə Cinayət Məcəlləsinin 73.2-ci maddəsinin tələblərinə əsasən, təqsirləndirilən şəxs cinayət məsuliyyətindən azad edilib və barəsindəki cinayət təqibinə xitam verilib.
mənbə: demokrat.az
