İstanbulda güclü leysan və fırtına ciddi fəsadlara səbəb olub. Hadisə nəticəsində iki nəfər ölüb, yolları su basıb, şəhərdə tədris bir günlük dayandırılıb.
Baş verənlər Azərbaycanda da yaxın günlərdə kəskin hava şəraitinin gözlənilib-gözlənilmədiyi sualını gündəmə gətirib.
Bakuplus.az məsələ ilə bağlı Milli Hidrometeorologiya Xidməti ilə əlaqə saxlayıb. Qurumun Proqnozlar Bürosunun direktoru Gülşad Məmmədova açıqlamasında bildirib ki, həftənin sonunadək Bakıda güclü yağışların yağacağı gözlənilmir.
"Əsasən Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gündüz bəzi şəhərətrafı ərazilərdə qısamüddətli az yağış yağacağı ehtimalı var. Mülayim cənub-şərq küləyi əsəcək. Havanın temperaturu gecə 17-20° isti, gündüz 22-26° isti olacaq. Atmosfer təzyiqi 766 mm civə sütunundan 763 mm civə sütununa enəcək. Nisbi rütubət 60-70 % olacaq" - deyə G.Məmmədova bildirib.
