Binəqədi Rayon Məhkəməsində oğurluqda təqsirləndirilən Qabil Binnətovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az xəbər verir ki, hakim Vüsal Tağıyevin sədrliyi ilə keçirilən prosesdə hökm elan olunub.
Məhkəmənin hökmü ilə o, 1 il 10 ay 28 gün müddətə azadlığın məhdudlaşdırılması (elektron qolbaq) cəzasına məhkum edilib və məhkəmə zalından azadlığa buraxılıb.
İttihama görə, Şirvan rayonundan iş axtarmaq məqsədilə Bakıya gələn Qabil Binnətov 2025-ci ildə Binəqədi rayonu ərazisində yerləşən kafedən oğurluq edib. Belə ki, o, hadisə günü əvvəlcə spirtli içki qəbul etdikdən sonra kafelərin birinə üz tutub və burada özünü kababçı kimi təqdim edərək iş istəyib. İşlə bağlı danışıq bitdikdən sonra o, masanın üzərində olan zərərçəkmiş şəxsə məxsus "iPhone 16 Pro" mobil telefonunu gizli şəkildə götürərək hadisə yerindən uzaqlaşıb.
Təqsirləndirilən şəxs məhkəmədə özünü təqsirli bildiyini, törətdiyi əməldən peşman olduğunu və zərərin ödənildiyini deyib.
Məhkəmə onun əməlini Cinayət Məcəlləsinin 177.1-ci maddəsi ilə (oğurluq) tövsif edərək hökm çıxarıb.
