Bu gün, 16 iyul tarixində Aşura günü münasibətilə Dini Qurumlarla İş üzrə Dövlət Komitəsi yanında Azərbaycan İlahiyyat İnstitutunda qanvermə aksiyası keçirilir. Bu haqda Bakuplus.az Report-a istinadən məlumat verir.
Aksiya komitənin təşəbbüsü, Gənclər Fondu, Milli QHT Forumu, Azərbaycan Könüllü Təşkilatları İttifaqının dəstəyi ilə təşkil olunub.
Aksiyada Dövlət Komitəsinin sədri Ramin Məmmədov, Milli Məclisin VI çağırış deputatları Əziz Ələkbərli, Ceyhun Məmmədov, ASAN Radionun direktoru Emin Musəvi, Türk Hava Yollarının (THY) Bakı nümayəndəliyinin rəhbəri Həmid Eldeleklioğlu, 43 qeyri-hökumət təşkilatının üzvləri, idmançılar və ictimaiyyət nümayəndələri iştirak edirlər.
Kampaniya çərçivəsində toplanan donor qanı hemofiliyalı, talassemiyalı və qanköçürməyə ehtiyacı olan digər xəstələrin müalicəsində istifadə olunacaq.
Bu gün Dini Qurumlarla İş üzrə Dövlət Komitəsi və Qafqaz Müsəlmanları İdarəsinin müəyyən etdiyi paytaxtın 8 ünvanında qanvermə aksiyaları keçirilir.
