Abşeron rayonunda 36 yaşlı kişi sevgilisinə xəsarət yetirməkdə ittiham olunub.
Hadisə Xırdalan şəhəri, Quşçuluq yaşayış massivi, Z.Bünyadov küçəsində baş verib.
1990-cı il təvəllüdlü Ayaz ailə üzvləri ilə birlikdə yaşadığı evdə onunla eyni ünvanda yaşayan sevgilisi Əsmərin (adlar şərtidir – red.) ona məxsus mobil telefona baxmaq istəməsini qəbul etməyib.
Bununla bağlı Əsmərə irad bildirərkən aralarında şəxsi münasibətlər zəminində mübahisə yaranıb. Ayaz həmin mübahisə zamanı Əsmərə hücum edərək əli və yumruğu ilə onun sifət və qol nahiyələrinə, təpiklə isə ayaqlarına və bədəninin digər nahiyələrinə ardıcıl zərbələr endirib.
Ayaz barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən Ayaz ona elan olunmuş ittiham üzrə özünü təqsirli bilib. O bildirib ki, hadisə günü yaşadığı evdə olarkən Əsmər mobil telefonuna baxmaq üçün ondan telefonu istəyib:
"Mən isə buna etiraz edərək telefonu ona vermədim. Bu səbəbdən aramızda mübahisə baş verdi. Mübahisə zamanı əsəbiləşərək onu döydüm".
Təqsirləndirilən şəxs ifadəsində törətdiyi əməldən peşman olduğunu, zərərçəkmiş şəxslə barışdıqlarını, onun ona qarşı hər hansı şikayət və tələbinin olmadığını bildirib.
Abşeron Rayon Məhkəməsinin hökmü ilə Cinayət Məcəlləsinin 73.2-ci maddəsinə əsasən, təqsirləndirilən şəxs barəsindəki cinayət işinə xitam verilib və o, cinayət məsuliyyətindən azad edilib.
Mənbə: demokrat.az
