Bakının Maştağa kəndində anadan olan Hacıağa Abbasov ömrünü Azərbaycan teatrının inkişafına və xalqın maariflənməsinə həsr edib.
Səhnə fəaliyyətinə 1905-ci ildə M.F.Axundzadənin "Hekayəti Molla İbrahimxəlil Kimyagər" əsərində Molla İbrahimxəlil rolu ilə başlayıb. Komik rolları ilə tanınan sənətkar aktyorluqla yanaşı, rejissorluq və dramaturgiya ilə də məşğul olub. Özünün yaratdığı Tənqid-Təbliğ Teatrına rəhbərlik edib, yeni aktyor nəslinin yetişməsində mühüm rol oynayıb.
Maraqlı fakt: rus ədəbiyyatına, xüsusilə yazıçı Lev Tolstoyun yaradıcılığına böyük maraq göstərən Hacıağa Abbasov 1907-ci ildə ədibin yaşadığı Yasnaya Polyanaya gedərək böyük yazıçı ilə şəxsən görüşüb. O, Tolstoyun əsərlərini tərcümə edir və səhnələşdirirdi.
Hacıağa Abbasov böyük satirik Mirzə Ələkbər Sabirlə Balaxanı kənd məktəbində müəllim işləyib. Özü də doğma Maştağada məktəb yaradaraq maarifçilik fəaliyyətinə töhfə verib, kəndlərdə məktəblərin açılması və qızların təhsilə cəlb olunması üçün çalışıb. Gənc istedadların yetişməsinə də xüsusi diqqət yetirib. Onun köməyi ilə Adil İsgəndərov Gəncədən Bakıya gətirilib və Moskvada təhsil almağa göndərilib.
Cəlil Məmmədquluzadənin "Ölülər" əsərindəki Şeyx Nəsrullah obrazı sənətkarın ən yaddaqalan rollarından biri olub. O, bu obrazı 50 dəfədən çox səhnədə canlandırıb.
Azərbaycan teatrının inkişafındakı xidmətlərinə görə 1932-ci ildə Azərbaycanın ilk Xalq artisti adına layiq görülüb.
Hacıağa Abbasovun həyat yolu çətinliklərsiz keçməyib. Repressiyaya məruz qalıb, uzun müddət təqib olunub və Orta Asiyada məcburi sürgündə yaşayıb. Lakin orada da teatr fəaliyyətini davam etdirərək truppalar və dərnəklər yaradıb.
Hacıağa Abbasov 1975-ci il mayın 7-də Bakıda vəfat edib. O, həyatını səhnəyə, sənətkar nəslinin yetişməsinə və xalqın maariflənməsinə həsr edən görkəmli şəxsiyyət kimi Azərbaycan tarixində iz qoyub.
