Bakıda qadın sevgilisini qarət edib.
Hadisə Səbail rayonundakı Dağüstü park ərazisində yerləşən parkinqdə baş verib.
Məlumata görə, 20 yaşlı Xatirə Məcidova (şərti ad), qardaşı və sevgilisi Mahir (şərti ad) sonuncunun idarə etdiyi "Toyota Prius" markalı avtomobildə olublar. Axşam saatlarında Mahir Xatirə və qardaşı ilə spirtli içki qəbul etdikdən sonra sükan arxasında yuxuya gedib. Bundan istifadə edən qız onun avtomobildəki 3750 manatlıq "Samsung S24 Ultra" telefonunu oğurlayıb.
Mahir oyananda telefonunun itdiyini görərək polisə müraciət edib. Daha sonra sevgilisi ilə hoteldə qalan Mahir, Xatirə yatarkən onun telefonundakı yazışmalardan oğurluqda şübhələnib.
Xatirə saxlanılıb və barəsində cinayət işi açılıb. O, ifadəsində iki azyaşlı övladının olduğunu, telefonu isə 900 manata satdığını bildirib.
Zərərçəkən Mahir telefonunun və ya dəymiş ziyanın qaytarılmadığını deyib.
Məhkəmənin qərarı ilə Xatirə Məcidova 8 ay 28 gün müddətinə azadlığın məhdudlaşdırılması cəzasına məhkum edilib.
mənbə: lent.аz
