Görkəmli şair, yazıçı, dramaturq Hüseyn Cavidin doğum günüdür. Hüseyn Abdulla oğlu Rasizadə (Hüseyin Cavid) 24 oktyabr 1882-ci ildə Naxçıvan şəhərində anadan olub.
İstanbul Universitetinin ədəbiyyat şöbəsini bitirən sənətkar Naxçıvan, Gəncə, Tiflis və Bakıda müəllimlik edib. Onun yaradıcılığında "İblis", "Şeyx Sənan", "Peyğəmbər", "Topal Teymur" və "Xəyyam" kimi əsərlər mühüm yer tutur.
Hüseyn Cavidin poeziyası onun romantik şeirlərindən və poemalarından ibarətdir. Şairi ədəbiyyat tarixində ən çox məşhurlaşdıran və ona böyük şöhrət qazandıran dram əsərləridir. O, Azərbaycan romantik mənzum dramaturgiyasının yaradıcısı və banisidir.
Qeyd edək ki, Hüseyn Cavidin əsərləri Azərbaycan Respublikasında dövlət varidatı elan edilən müəlliflərin siyahısına daxil edilib.
Şair 1938-ci "əks-inqilabi əlaqələr saxlamaq", "müsavatçılarla söhbətlər aparmaq" və gənc şairləri millətçi düşüncələrlə yetişdirmək kimi ittihamlarla günahlandırılaraq həbs olunub və 8 il islah əmək düşərgəsinə məhkum edilib. O, 1941-ci ildə İrkutsk vilayətinin Tayşet rayonunda dünyasını dəyişib. Ölümündən sonra 1956-cı il martın 6-da bəraət alıb.
Şairin cənazəsinin qalıqları 1982-ci ildə ümummilli lider Heydər Əliyevin təşəbbüsü ilə uzaq Sibirdən gətirilərək doğma yurdu Naxçıvanda dəfn olunub.
