Xətai və Nizami rayon məhkəmələri təqsirləndirilən şəxslər barəsində 4 aylıq həbs qərarı verib.
Bakının Xətai rayonunda yerləşən "Ab-Hava" restoranında bir nəfərin ölümü ilə nəticələnən kütləvi dava ilə bağlı altı nəfər barəsində həbs qətimkan tədbiri seçilib. Həbs olunanlar arasında Milli Məclisin deputatı Arzuxan Əlizadənin oğlu Əhməd Əli-zadə də var.
Bakuplus.az-ın əldə etdiyi məlumata görə, Xətai Rayon Məhkəməsi beş nəfər barəsində istintaq orqanının təqdimatını təmin edib.
Məhkəmənin qərarı ilə aşağıdakı şəxslər 4 ay müddətinə həbs olunublar:
- Kamran Səttar oğlu Əfəndiyev;
- Mikayıl Vəli oğlu İsmayılov;
- Ramil Zahir oğlu Dadaşov;
- Eldar Faiq oğlu Eldarov;
- Həsən Mehman oğlu Zülfiqarov.
Kamran Əfəndiyev, Mikayıl İsmayılov, Ramil Dadaşov və Həsən Zülfiqarovun həbs müddəti oktyabrın 23-dən, Eldar Eldarovun isə oktyabrın 24-dən hesablanır.
Deputatın oğlu Əhməd Arzuxan oğlu Əli-zadə barəsində həbs qətimkan tədbirinin seçilməsi məsələsinə isə başqa məhkəmədə baxılıb.
Belə ki, Xətai Rayon Məhkəməsində hakimlərin özlərinə etiraz etməsindən sonra materiallar Bakı Apellyasiya Məhkəməsinə göndərilib. Apellyasiya Məhkəməsinin qərarı ilə işə baxılması Nizami Rayon Məhkəməsinə həvalə olunub.
Nizami Rayon Məhkəməsi də istintaq orqanının təqdimatını təmin edərək Əhməd Əli-zadə barəsində 4 aylıq həbs qətimkan tədbiri seçib. Onun həbs müddəti oktyabrın 24-dən hesablanır.
Məhkəmə məlumatlarına əsasən, altı nəfərin hamısına Cinayət Məcəlləsinin 218.1, 218.2, 234.4.1, 234.4.3, həmçinin 29, 234.4.1 və 29, 234.4.3-cü maddələri ilə ittiham irəli sürülüb.
Bu maddələr cinayətkar birlik yaratma və belə birlikdə iştirak etmə, narkotik vasitələrin qanunsuz dövriyyəsi ilə bağlı ağırlaşdırıcı halları, eləcə də cinayətə cəhdi əhatə edir.
Xatırladaq ki, hadisə oktyabrın 23-də Xətai rayonunda, General Şıxlinski küçəsində yerləşən "Ab-Hava" restoranında baş verib.
Kütləvi dava zamanı Ceyhun adlı şəxs həyatını itirib. Daxili İşlər Nazirliyinin məlumatına görə, hadisədə iştirak edən 9 nəfər müəyyən edilərək saxlanılıb.
Ölüm faktı ilə bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.
