Bu günlərdə AZAL-ın adından külli miqdarda pul mükafatı ilə bağlı xəbərin yer aldığı şübhəli link yayılıb. Bu cür mesajlar, xüsusən, mesencerlər, sosial şəbəkələr və ya elektron poçt vasitəsilə göndərilir. Bu haqda bu gün, 4 avqust tarixində “Azərbaycan Hava Yolları” QSC-nin (AZAL) mətbuat xidmətindən bildirilib.
AZAL vətəndaşları diqqətli olmağa və şübhəli linklərə daxil olmamağa çağırır. AZAL-ın bütün rəsmi məlumatları aviaşirkətin rəsmi internet saytında (www.azal.az), həmçinin sosial şəbəkələrdəki səhifələrində yerləşdirilib.
Bundan əlavə, son vaxtlar AZAL adından hüquqi və fiziki şəxslərə müxtəlif əməkdaşlıq, işlə təminat və s. təkliflər daxil olur.
AZAL-ın adından istifadə edərək dələduzluqla məşğul olan bu kateqoriyadan şəxslərin aviaşirkətlə heç bir əlaqəsi yoxdur və şirkət verilən qeyri-rəsmi vədlərə görə heç bir məsuliyyət daşımır.
“Belə hallarla qarşılaşan vətəndaşlardan dərhal hüquq-mühafizə orqanlarına müraciət etmələrini xahiş edirik”, - deyə aviaşirkətdən bildirilib.
