Bakı Ali Neft Məktəbində SOCAR və İqtisadiyyat Nazirliyinin yanında olan IV Sənaye İnqilabının Təhlili və Koordinasiya Mərkəzinin (4SİM) birgə təşkilatçılığı ilə “Energetika və IV Sənaye İnqilabı” hakatonu 9-11 sentyabr tarixlərində keçiriləcək. Bu haqda bu gün, 26 iyul tarixində Bakuplus.az məlumat verir.
Müsabiqə Azərbaycanda, xüsusilə Şərqi Zəngəzur və Qarabağ iqtisadi rayonlarında “yaşıl” və rəqəmsal enerji texnologiyalarının tətbiqi, bərpa olunan enerji mənbələrindən istifadənin genişləndirilməsi və enerji təhlükəsizliyinin gücləndirilməsi üzrə innovativ ideyaların dəstəklənməsi məqsədilə təşkil olunur. Bununla bağlı “Enerji və IV Sənaye İnqilabı” hakatonu “Enerji və əşyaların interneti”, “Enerji və süni intellekt”, “Enerji və rəqəmsal iqtisadiyyat” kateqoriyaları üzrə keçiriləcək.
Yarışın şərtlərinə əsasən, ilk üç yeri tutan komandalar müvafiq olaraq 5000 manat, 3000 manat və 2000 manat məbləğində pul mükafatı alacaqlar. Bundan əlavə, daha iki komandaya 500 manat məbləğində həvəsləndirici mükafat veriləcək.
Hakatonda iştirak etmək istəyənlər avqustun 20-dək təşkilat komitəsinə müraciət edə bilərlər.
Müsabiqənin qaydaları və qeydiyyat forması artıq mövcüddür.
