Artıq üç gün idi ki, Bakı avtobuslarında kondisionerlər işə salınmalı idi. Amma sərnişinlər hələ də avtobusların şüşələrini açaraq birtəhər istidən xilas olmağa çalışırlar. Bu haqda BizimMedia reportaj hazırlayıb.
Əksər marşrutlar Bakı Nəqliyyat Agentliyinin (BNA) təlimatından yan keçir. Son üç gündə havanın temperaturu kəskin artsa da, avtobuslarda kondisioner işləmir.
Belə ki, sərnişinlər marşrut xətlərində olan avtobuslarda, o cümlədən “BakuBus”-a aid olan, Hövsan qəsəbəsi istiqamətində hərəkət edən 175 saylı avtobusda kondisionerlərin işləmədiyi haqqında şikayət edir.
BNA-nın rəsmi Mais Ağayevin sözlərinə görə, BNA tənzimləyici orqandır. “Paytaxtda işləyən avtobuslar ayrı-ayrı şirkətlərə məxsusdur. Biz də onlara tövsiyə etmişik ki, iyunun 1-dən avtobuslarda kondisionerləri qoşsunlar. Təəssüf ki, bu sahədə müəyyən nöqsanlar var. Biz də çalışırıq ki, bu nöqsanlar aradan qaldırılsın”, - deyə Ağayev bildirib.
BNA-dan fərqli olaraq, “BakuBus” MMC-nin sədri Elnur Qarayev özünün direktor olduğunu və jurnalistlərin suallarını cavablandırmaq məcburiyyətində olmadığını əsas gətirərək, hər hansı şərh verməkdən imtina edib.
