Bakıda fransız kino günlərinə start verilir. Bu haqda 3 iyun tarixində Bakuplus.az Bakı Şəhər Mədəniyyət Baş İdarəsinə istinadən xəbər verir.
İyunun 7-dən Bakıda “100 faizlik klassiklər: Fransız kino həzzi” adlı film nümayişləri başlayır. Nümayiş Azərbaycan Kinematoqrafçılar İttifaqı ilə Azərbaycanda Fransız İnstitutu və Fransanın Azərbaycandakı səfirliyinin əməkdaşlığı çərçivəsində baş tutacaq. Filmlər “Azərbaycan” kinoteatrında fransız dilində, Azərbaycan və ingilis altyazıları ilə təqdim olunacaq.
Filmlərin siyahısı:
7 iyun - “Atalanta” (Jan Viqo)
14 iyun - “Baltazar” (Rober Bresso)
21 iyun - “Uçuş zolağı” və “Sibirdən məktublar (Kris Marker)
Nümayişə giriş pulsuzdur, lakin kinoteatra daxil olmaq üçün izləyicilərdən peyvənd pasportu tələb olunacaq.
1934-cü ildə Jan Viqo tərəfindən çəkilən “Atalanta” filmi “Atalanta” gəmisinin kapitanı Janın, kənd qızı Cülyetta ilə evliliyi və onların Parisə bal ayı səyahətindən bəhs edir.
1966-cı ildə Rober Bressonun çəkdiyi “Baltazar” filmi dünya kino dərsliklərinin ön sıralarında yer alır. Filmin qəhrəmanı Baltazar adlı uzunqulaqdır. Bu adı ona uşaqlar verib. Baltazar hər dəfə yeni insanlarla tanış olanda, onların xasiyyətlərini öyrənir. Onun ən çox xatırladığı isə Mari adlı qız olur.
1962-ci ildə Kris Markerin çəkdiyi qısametrajlı və yeganə bədii filmi hesab edilən “Uçuş zolağı”nda üçüncü dünya müharibəsinin termonüvə zərbəsindən sonra sağ qalan parislilərin yeraltı katakombalarda yaşamasından bəhs edilir. Film fantastik janrda lentə alınıb və tamaşaçıya antiutopik hisslər yaşadır.
1957-ci ildə Kris Markerin lentə aldığı “Sibirdən məktublar” sənədli filmi Sibirin təbiətindən, orada yaşayan insanların həyatından, cəmiyyətin müasirləşməsindən bəhs edir.
