Gündəlik işlərə və qayğılara qapılan Bakı sakinləri getdikcə böyük şəhərin səs-küyündən uzaqlaşmağın yolunu axtarır. Ancaq hər kəsin kəndin səssizliyinə qərq olub təbiət qoynunda olmaq üçün kifayət qədər vaxtı olmur. Yeni sosial layihə olan Zagulba FM yaradıcıları sizə Bakıdan 30 dəqiqəlik məsafədə alternativ istirahət təklif edir. Burada qonaqlar sevimli filmlərinə baxa, ocağın yanında gitara ilə birlikdə oxuya və dinləyə, eləcə də səyyar mətbəx-karvanda təqdim olunan yeməklər və içkilərlə təravətlənə bilərlər.
Bakuplus.az layihənin yaradıcısı Əli Əliyevlə tanış olub, yeni məkanın xüsusiyyətlərini öyrənib.
- Sizi daha yaxından tanımaq istərdik. Komandanız haqqında nələr danışa bilərsiniz?
Zagulba FM insanlara xoş aura ötürmək üçün yaranan bir əyləncə və kino məkanıdır. Hətta deyərdik ki, bir məkandan daha artıqdır. Çünki komandamızın bütün üzvləri kreativ, gülərüz və səmimi insanlardır ki, bu da sizin istirahətinizi ikiqat yaddaqalan edir. Hər kəs fərqli sahədə çalışsa belə, mehriban və hər işi yerində və vaxtında həyata keçirə bilməyimiz üçün bizə heçnə mane olmur. Korporativ tədbirlər, mədəniyyət gecələri, film gecəsi və müxtəlif master-klaslar üçün bizə müraciət edə bilərsiniz. Hər kəsin zövqünə və prioritetinə uyğun tədbir keçirəcəyimizə əmin ola bilərsiniz.
- Belə qeyri-adi məkanı yaratmaq ideyası sizdə necə yaranıb?
Ölkəmizdə fərqli istirahət məkanlarının axtarışında olan çox insan var. Elə biz də o sihayıda idik. Düşündük ki, musiqinin, istirahətin, xoş auranın, yeni dostluqların və mehribanlığın birləşdiyi bir məkan yaradaq. Bu bizdə düşündüyümüzdən daha gözəl alındı və inkişaf etməkdə davam edir.
Qarşıda tam bir yay. Qonaqlarınız üçün sürprizlər hazırlayırsınız?
Əlbəttə. Bizim məkanda, demək olar ki, hər həftə yeniliklər olur. Həmçinin məkanımızın qonaqlarına biletin qiymətinə daxil olmayan xoş sürprizlər edirik. Məsələn, son bir neçə həftədə filmdən sonra olan musiqi saatına gitaradan əlavə əsrarəngiz səsi ilə saksafon da əlavə etmişik.
- Yay mövsümü bitəndən və havalar soyuyandan sonra nə etmək fikrindəsiniz? Qış üçün planlarınız varmı?
Əslində ideyalarımız çoxdur. Və düşünürük ki, qış mövsümü və ümumiyyətlə soyuq aylar üçün də fərqli əyləncə ilə gələk. Lakin bu hələ ki sürprizdir. Əminik, bir çox insan bəyənəcək.
Komandanızda kino sənayesi ilə əlaqəsi olan varmı, yoxsa sizi yalnız kino sevgisi birləşdirir?
Xeyr. Komandamızda hər kəs fərqli sahələr üzrə çalışır. Lakin bizi birləşdirən hamının özünəməxsus kreativliyidir. Fərqli beyinlər birləşəndə isə ortaya gözəl iş çıxır.
- İzləyicilərimizə müraciət etmək imkanınız var. Onları cəlb etmək və qonaq kimi məkanınıza dəvət etmək üçün nə deyə bilərsiniz? Niyə insanlar məhz sizi seçməlidir?
Səmimi ortamı və şəhərin rutinindən uzaq, ocaq ətrafında fərqli bir istirahəti görmək və, ən əsası, yaşamaq istəyirsinizsə bizi seçməlisiniz! Bunu əminliklə deyirik. Bizə bir dəfə gələn doğma olur və gəlişi heç bir zaman sonuncu olmur. Qısaca onu deyə bilərik ki, hər şeyi öz gözlərinizlə görməlisiniz.
