Bakının 2 saylı Dəri-Zöhrəvi Dispanserində pandus olmadığından əlil arabasında olan şəxs həkimə müraciət etmək üçün 2-ci mərtəbəyə qalxa bilməyib. Bu, onun bir neçə saat gözləməsinə səbəb olub. Bu haqda bu gün, 4 avqust tarixində Oxu.az məlumat verib.
Əlil arabasından istifadə edən Rəfail Quliyev tibb müəssisəsinə gedə bilməməsindən şikayətlənir.
“Dispanserin girişindən tutmuş daxili infrastrukturuna qədər əlilliyi olan şəxslər üçün problemdir. Həkimlər ikinci mərtəbədə otururlar. Onlara yaxınlaşa bilmirik. Çünki şəkildə gördüyünüz hündür pillələr imkan vermir. Ona görə də iki saatdan çox həkimin yaxınlaşmasını gözlədim. Təqribən bir saat da reseptin yazılıb gətirilməsini gözlədim”, - kişi yazıb və əlavə edib ki, həkimin heç bir günahı yoxdur, - “Həkimin qapısı ağzında gözləyən pasiyentlər də mənim kimi xəstələr idi. Onlara da xidmət göstərilməli idi. Burada bir günahkar varsa, o da müəssisəyə rəhbərlik edənlərdir. Xidməti düzgün qurmayıblar. Belə olan halda həkimin köməkçisi olmalıdır. Eyni zamanda ölkədə əlilliyi olan şəxslər nəzərə alınmalıdırlar. Qapının girəcəyində 20 sm hündürlüyü olan pillələr var. Ora bizim kimi əlilliyi olan şəxslərin rahatlığı üçün pandus qoymaq üçün cəmi iki vedrə çınqıl, bir vedrə sement lazımdır. Onu etmək, görəsən, çoxmu çətindir?!”
TƏBİB-in İctimaiyyətlə əlaqələr və tədbirlər şöbəsinin müdiri Zamirə Ədilova 2 saylı dəri-zöhrəvi dispanserdə liftin olmadığını bildirib. Onun sözlərinə görə, bunu nəzərə alaraq dispanserin birinci mərtəbəsində fiziki məhdudiyyətli insanlar üçün xüsusi otaq yaradılıb. Belə xəstələr gələndə birinci mərtəbəyə həkimlər çağırılır, orada müayinələr aparılır.
Tibb müəssisəsinin girişindəki hündür pilləkənə gəlincə, Adilovanın inandırdığı kimi, orada pandusun quraşdırılması nəzərdə tutulub.
