Paytaxt ərazisində dövlət qeydiyyat nişanı olmadan və əlavə konstruksiya dəyişikliyi edərək, ön hissəsini yuxarı qaldıraraq avtomobil idarə edən sürücülərə qarşı silsilə reydlər başlanılıb. Bu haqda BakuPlus.az Qafqazinfo-ya istinadən bu gün, 29 iyul tarixində xəbər verir.
Bakı Şəhər Baş Polis İdarəsindən verilən məlumata görə, bu cür sürücülərin xüsusilə toplaşdığı ərazilərdən biri olan metronun “Memar Əcəmi” stansiyası yaxınlığında 15-dən çox avtomobil saxlanılıb.
İdarənin baş inspektoru Araz Əsgərli bildirib ki, həmin ərazidə yol hərəkəti qaydalarını və ictimai asayişi davamlı şəkildə pozan şəxslərlə bağlı tədbirlər mütəmadi qaydada aparılır:
“Bir sıra sürücülər tərəfindən kobud qayda pozuntuları aşkarlanıb. Bildiririk ki, bu cür proseslərin qarşısı çox kəskin formada alınacaq və ətrafdakı insanlara narahatlıq yaradan, ictimai qaydaları pozmaqla vətəndaşımız üçün təhlükəli vəziyyət yaradan hər kəsə qarşı qanun çərçivəsində tutarlı formada tədbirlər davam etdiriləcək. Avtomobili nömrəsiz, ön hissəsini qaldıraraq, cəmiyyətə nümayişkaranə şəkildə hörmətsizlik edərək sürən sürücülərə bir daha xəbərdarlıq edirik”.
