Son vaxtlar paytaxt küçələrində elektroskuter sürənlərə tez-tez rast gəlmək olar. Sürətlə hərəkət edən bu nəqliyyat vasitələrinin sürücüləri təhlükə yaradır. Bu haqda ATV reportaj hazırlayıb.
Elektrik skuterlərdən istifadə şəhərdə tıxaclardan xilas olmağa kömək edir. Karantin dövründə ictimai nəqliyyatda olan məhdudiyyətlər moped, motosiklet və skuterlərə tələbatı artırıb. Ancaq bəzən sadalanan nəqliyyat vasitələri ciddi təhlükə mənbəyi ola bilər.
Mütəxəssislər deyir ki, bu növ nəqliyyat vasitələri səssiz olduğuna görə, qəza təhlükəsi qaçılmaz olur. Qanunda bu cür vasitələr qeyri-mexaniki nəqliyyat vasitəsi sayılır. Onları idarə etmək üçün sürücülük hüququ tələb olunmur. Skuterlər dövlət qeydiyyatına da alınmır. Bu isə bəzi fürsətçilərin işinə yarıyır, sürücülər qəzalara səbəb olurlar. Skuteri içkili vəziyyətdə belə idarə edənlər var.
Bakı şəhər Baş Polis İdarəsinin Dövlət Yol Polisi İdarəsinin baş inspektoru Araz Əsgərlinin sözlərinə görə, bu növ nəqliyyat vasitələri ilə qayda pozan şəxslərə, hallara uyğun olaraq, inzibati xətalar məcəlləsinin 338-ci maddəsində 20 manatdan 100 manata qədər cərimələrin tətbiqi nəzərdə tutulur.
Mütəxəssislər deyir ki, problemin aradan qaldırılmasının ən yaxşı yollarından biri parklarda və küçələrdə skuterlər üçün xüsusi hərəkət zolağının ayrılmasıdır.
