Ürək çatışmazlığı və pnevmoniya ilə doğulan uşağın həyatını xilas etmək mümkün olub. Bu barədə bu gün, 16 iyun tarixində Kliniki Tibbi Mərkəzin mətbuat xidmətinin rəhbəri Elnur Hidayətoğlu məlumat verib.
O bildirib ki, 2022-ci il mayın 31-də Mərkəzin Doğum-Ginekologiya şöbəsində dünyaya gələn oğlan 14 günlük mübarizədən sonra həyata qaytarılıb.
Anaya hamiləlik zamanı koronavirus infeksiyasının ağır forması diaqnozu qoyulub, yeni doğulmuş körpənin ürəyində VSD (ventrikulyar septal defekt), ağciyərlərində isə pnevmoniya aşkarlanıb. Doğuşdan dərhal sonra uşaq süni tənəffüs aparatına qoşulub.
Həkimlər, körpənin iki həftə ərzində bir neçə dəfə klinik ölüm yaşamasına baxmayaraq, onu xilas edə biliblər. İndi uşaq ağır vəziyyətdən çıxarılaraq süni nəfəs aparatından ayrılıb. Müayinə və müalicə nəticəsində uşağın vəziyyəti qənaətbəxşdir. O, oksigenə ehtiyac duymur və sərbəst qidalanır.
Həmin uşaq ailənin üçüncü övladıdır. Ailənin ikinci uşağında da anadangəlmə ürək xəstəliyi olub və 14 gün sonra o, dünyasını dəyişib.
