İnternat məzunu olan 32 yaşlı Vüsal İbrahimov deyir ki, o, kiçik yaşlarından həyatın çətinlikləri ilə üzləşib. Hazırda o, 4 nəfərlik ailəsi ilə Qaradağ rayonu, Sahil qəsəbəsi, Emin Quliyev küçəsindəki 18 saylı yataqxanada olan kiçik otaqda yaşayır. Bu haqda bu gün, 14 iyul tarixində Real TV reportaj hazırlayıb.
Anasının ölümü ailənin 5 uşağının müxtəlif internat məktəblərinə yerləşdirilməsinə səbəb olub. Vüsal isə Qaradağ rayonunun Sahil kəndindəki 14 saylı özəl internat məktəbində böyüyüb.
Vüsal ailə həyatı qurduqdan sonra kirayədə yaşadığını deyir. Sonralar qəsəbə İƏD (inzibati ərazi dairəsi) nümayəndəliyi ona hazırda yaşadığı yataqxanadan mənzil verib. Vüsal iddia edir ki, ona 2 otaqlı ev vəd ediblər. Lakin vəd yerinə yetirilməyib.
Kiçik otağının yaratdığı problemlərdən şikayətçi olan Vüsal iddia edir ki, Qaradağ Rayon İcra Hakimiyyəti (RİH) də bu məsələyə biganə yanaşır. O, valideynlərini itirmiş və valideyn himayəsindən məhrum olmuş şəxslərin sosial-məişət şəraitinin yaxşılaşdırılması ilə bağlı qanunvericilikdə nəzərdə tutulmuş güzəştlərdən də yararlana bilməyəcəyini iddia edir.
Əmək və Əhalinin Sosial Müdafiəsi Nazirliyinin tabeliyindəki Sosial xidmətlər agentliyindən bildirildi ki, sosial-məişət şəraitinin yaxşılaşdırılması ilə bağlı hazırda mövcud qanunvericiliyə uyğun olaraq, yerli RİH-nin orqanına müraciət edilməsi və növbə alınması tövsiyə olunur.
Sosial-məişət şəraitinin yaxşılaşdırılmasına ehtiyacı olan, yerli RİH-nin orqanlarında uçota alınmış şəxslərin müraciətlərinə müvafiq qanunvericilik aktları qəbul ediləcəyi təqdirdə baxılması nəzərdə tutulur.
Məsələ ilə bağlı Qaradağ RİH-dən bildirildi ki, Vüsal İbrahimova aztəminatlı ailə kimi hər zaman icra hakimiyyəti tərəfindən köməklik edilib. 2019-cu ildə o, Emin Quliyev küçəsində 8 saylı yataqxanada müvəqqəti bir otaqla təmin edilib. Həmçinin 1 saylı DOST mərkəzində işə düzəldilib. Lakin ötən il öz istəyi ilə işdən çıxıb. Qurum tərəfindən, həmçinin ona dəfələrlə ərzaq yardımları olunub. Ev məsələsi ilə bağlı qurumdan qeyd edildi ki, icra hakimiyyətinin balansında ev yoxdur. Eyni zamanda, mənzil təminatı icra hakimiyyəti tərəfindən aparılmır.
