2 avqust – Milli Kino Günü münasibətilə silsilə tədbirlər təşkil olunacaq. Bu haqda BakuPlus.az Azərtac-a istinadən bu gün, 29 iyul tarixində xəbər verir.
Cəfər Cabbarlı adına “Azərbaycanfilm” Kinostudiyası avqustun 1-də “Azərbaycan Kinosu Günü” adlı tədbir təşkil edəcək. Bununla yanaşı, həmin gün kinostudiyanın yeni loqo və saytının təqdimatı keçiriləcək.
Eyni zamanda kinostudiyanın 100 illiyi (2023) münasibətilə “Qarabağ” mövzusunda elan olunan ssenari müsabiqəsinin qaliblərinin adları açıqlandıqdan sonra mükafatlandırma mərasimi baş tutacaq.
Tədbirdə “Azərbaycanfilm”in rəhbərliyi tərəfindən qarşıdan gələn 100 illik yubiley ilə bağlı tədbirlər planı haqqında da ictimaiyyətə məlumat veriləcək.
Avqustun 1-də, həmçinin Azərbaycan Dövlət Film Fondunun həyətində Milli Kino Günü münasibətilə sərgi keçiriləcək. Sərgi Cəfər Cabbarlı adına “Azərbaycanfilm” kinostudiyası və Dövlət Film Fondunun birgə təşkilatçılığı ilə reallaşacaq.
Təqdim ediləcək eksponatlar “Azərbaycanfilm” və Film Fondunda qorunan avadanlıqlardır.
Azərbaycan Respublikası Kinematoqrafçılar İttifaqı (ARKİ) da Milli Kino Gününə xüsusi hazırlaşıb. Avqustun 2-də təşkil ediləcək bayram tədbirində Milli Kino Mükafatı təqdim ediləcək.
Builki Milli Kino Mükafatına 75 illik yubileyini qeyd edən Xalq rəssamı Rafiq Nəsirov layiq görülüb.
Azərbaycan Kinematoqrafçılar İttifaqı (AKİ) isə Milli Kino Günündə, ənənəvi olaraq özünün kino mükafatını üç nominasiyada sahiblərinə təqdim edəcək.
Avqustun 1-də AKİ-nin bu ilin fevralında elan etdiyi “Mən qadınam” qısametrajlı ssenari müsabiqəsinin qalibləri də elan olunacaq.
