Paytaxtın əbədi problemlərindən biri də parkinq məsələsidir. Bu problem həm sürücülər, həm də piyadalar üçün çətinlik yaradır. Şəhərin müxtəlif yerlərində səkidə park edilmiş avtomobillər piyadaların normal hərəkətinə mane olur. Bu haqda bu gün, 5 iyul tarixində Bakuplus.az ARB24-ə istinadən məlumat verir.
Sürücülər avtomobilləri səkidə park etməyi əlacsızlıqla əlaqələndirsələr də, bu qanunla qadağandır. Nəqliyyat məsələləri üzrə mütəxəssis Elməddin Muradlı deyir ki, səkilərdə parklanma o qədər təhlükəli və xoşagəlməz haldır ki, artıq bununla bağlı qanunvericilikdə dəyişikliklər etmək istəyirlər.
“Yaxın vaxtlarda, yəgin ki, bu Milli Məclisdə təsdiqlənəcək. Səkidə parklanma digər parklanma qaydalarının pozulmasından daha ağır cəza ilə cəzalandırılacaq. Biz bunu alqışlayırıq, çünki bu qayda pozuntuları bir-birindən fərqlənməlidir.”
BNA-nın mətbuat xidmətinin rəhbəri Mais Ağayevin sözlərinə görə, bu kimi problemlərin həll olunması istiqamətində tədbirlər görülür: “Səkilərin bu formada zəbt olunmasının qarşısını almaq məqsədilə tərəfimizdən müxtəlif tədbirlər həyata keçirilir. Buna misal olaraq təhlükəsizlik tumbaların quraşdırılmasını qeyd etmək istərdim. Son bir neçə ildə agentlik tərəfindən 167 küçə və prospektə təhlükəsizlik tumbaları quraşdırılıb. Nəticədə piyadaların səki boyunca rahat, maneəsiz və təhlükəsiz hərəkəti təmin edilib”.
Hazırda dayanma-durma qaydalarını pozan sürücülər 20 manat məbləğində cərimə olunur. Lakin yeni qərarda dayanma-durma qaydalarını pozan bəzi sürücülərə 20 manat deyil, 40 manat cərimə nəzərdə tutulub. Bunlar avtomobillərini səkilərdə və ya yol ayrıcılarında saxlayan sürücülərə aiddir. Milli Məclisin Plenar İclasının birinci oxunuşunda qəbul olunan qərarın güvvəyə minəcəyi vaxt hələ ki bəlli deyil.
