Bakıda noyabr ayında öz biznesini qurmaq istəyən qadınlar üçün təlim keçiriləcək. Bu haqda bu gün, 8 oktyabr tarixində Bakuplus.az məlumat verir.
Təlim ABŞ-nin Beynəlxalq İnkişaf Agentliyi və German Marşal Fondunun Regional Əməkdaşlıq üçün Qara Dəniz Təşkilatının maliyyə dəstəyi ilə “Açıq Platforma” və “Gender Hub Azerbaijan” sosial platformaları tərəfindən keçiriləcək.
Proqram regionlarda və Bakıda yaşayan 26 qadına müxtəlif sosial biznes bacarıqlarını aşılamaqla onların əmək bazarında fəallığını artırmaq və iqtisadi azadlıqlarının inkişafına müsbət təsir göstərmək məqsədi daşıyır.
Layihədə Bakı və digər regionlarda yaşayan, sosial biznesin istiqamətləri haqqında müəyyən anlayışı olan və ya öz biznesini qurmaqda maraqlı olan 18-35 yaş arası xanımlar həm komanda, həm də fərdi şəkildə iştirak edə bilərlər.
Təlim noyabrdan mart ayına kimi fiziki və onlayn şəkildə ilk olaraq Bakıda üç günlük təlimlər şəklində başlayacaq.
Mühazirələr 4, 5, 6 noyabr (cümə, şənbə, bazar) saat 09:30-dan saat 18:00-a kimi təşkil olunacaq.
Layihədə iştirak etmək istəyənlər qeydiyyat linkini doldura və ya 050 546 96 87 nömrəsi ilə Whatsapp ilə əlaqə saxlaya bilərlər. Son qeydiyyat tarixi: 20 oktyabr. İştirak ödənişsizdir.
