Bakıda “Sistem inzibatçısı” üzrə təlimə qeydiyyat başlayıb. Bu haqda BakuPlus.az Azərtac-a istinadən bu gün, 30 may tarixində xəbər verir.
Təlimlər Peşə Təhsili üzrə Dövlət Agentliyinin təşkilatçılığı ilə keçiriləcək.
İştirakçıları “Windows” platformalı serverlərin əməliyyat sistemlərinin qurulması, idarə olunması, proqram təminatlarının paylanması, yenilənməsi, serverlərin profillənməsi və monitorinqi, nasazlıqların aşkarlanması və aradan qaldırılması kimi sahələrdə biliklər əldə edəcəklər. İştirakçıların əldə etdikləri nəzəri bilikləri təlim zamanı tapşırıqlar vasitəsilə təcrübədə tətbiq etmək imkanları olacaq.
Təlimlər Sənaye və İnnovasiyalar üzrə Bakı Dövlət Peşə Təhsili Mərkəzində keçiriləcək.
İki ay yarım davam edəcək təlimdə orta ixtisas/peşə və ya ali təhsilli, ingilis dilini başlanğıc səviyyədə bilən, informasiya texnologiyaları üzrə təhsili və ya iş təcrübəsi olanlara üstünlük veriləcək.
Müraciətlər iyunun 6-dək qəbul olunur.
