Bakıda məktəb kollektivi Şuşaya səfər adı ilə aldadılıb. Bu haqda 30 may tarixində Qafqazinfo.az məlumat verib.
Şuşa şəhəri 1 saylı tam orta məktəbin müəllim heyətinə özünü “Şimşək Turizm” şirkətinin rəhbəri kimi təqdim edən Əlizamin Canızadə Şuşaya tur təşkil etdiyini bildirib. Səfərə getmək üçün isə 70 nəfər müraciət edib və hər biri ona 22 manat ödəyib.
Daha sonra Canızadə səfəri 30 may tarixinə təyin edib və səhər saatlarında başlayacağını deyərək, kollektivə həmin gün məktəbin qarşısına toplaşmağı tapşırıb. Amma 29 may tarixindən müəllimlər ona zəng etsələr də, o, telefona cavab verməyib.
Buna baxmayaraq, ümidlərini itirməyən 70 nəfər deyilən tarixində, yəni bu gün səhər saatlarında məktəbin qarşısında toplaşıb. Lakin təyin olunan saatda nə səfər üçün ayrılacağı vəd edilən avtobus, nə də həmin şəxs gəlib. Aldadıldıqlarını başa düşən məktəbin rəhbərliyi polisə müraciət edib.
