Paytaxtda metro stansiyalarının çıxışında taksofonlara rast gəlmək mümkündür. Lakin 5, 10, 20, 50 qəpik, eləcə də taksofon kartları ilə istifadə olunan aparatlar çox nadir hallarda işlək vəziyyətdə olur. Bu haqda ARB TV reportaj hazırlayıb.
Taksofondan istifadə etmək üçün əvvəlcə telefonun dəstəyini götürmək, daha sonra isə qəpiyi ora atıb istənilən nömrəyə zəng etmək olar. Amma bəzi vaxtlarda taksofon qəpiyi qəbul etsə də, dərhal geri qaytarır və artıq heç bir nömrəyə zəng etmək mümkün olmur. Digər nasaz taksofonlar isə qəpikləri də qaytarmır.
Taksofonlara cavabdeh olan “Aztelekom” MMC-dən verilən məlumata görə, gün ərzində bir neçə taksofon aparatında texniki nasazlıq baş verir. Siqnal mərkəzi server avadanlığına qeydiyyata düşür və dərhal sahə mühəndisinə ötürülür. Təxminən 1-2 saat ərzində problem aradan qaldırılır.
