Suraxanı rayonu, Yeni Günəşli qəsəbəsində yerləşən 282 nömrəli məktəbin dörd giriş qapısı olsa da, üçü bağlıdır. Bu haqda bu gün, 23 fevral tarixində Bakuplus.az Xəzər Xəbər-ə istinadən məlumat verir.
Hazırda açıq olan girişdən istifadə etmək üçün hərəkətin intensiv olduğu yoldan keçmək lazımdır. Valideynlərin narahat olduqları məqamlardan biri də məhz budur.
Məsələ ilə bağlı sözügedən məktəbin direktoru Səadət Məmmədova bildirib ki, təhsil ocağı fəaliyyətə başladığı gündən indiyədək məhz hazırda açıq olan giriş qapısından istifadə edilib. Şagirdlərin təhlükəsizliyinin təmin olunması üçün digər giriş qapılarının bağlı saxlanmasına qərar verilib.
“Ərazi pis vərdişləri olan insanların yığışdığı bir məkana çevrilib. Şagirdlərimiz üçün pis nümunə olub. Yaxınlıqda yerləşən fermanın iribuynuzlu mal-qarasının otlaq ərazisinə çevrilib. Və həmin qapıların nəzarətsiz və 24 saat açıq qalmasına görə məktəb ərazisi davamlı olaraq istənilən bir şəxs tərəfindən daxil olması mümkün olan nəzarətsiz bir əraziyə çevrilmişdi. Biz onun qarşısını almaq məqsədilə əsas giriş qapısını açıq saxlamaqla digər qapılardan giriş-çıxışı məhdudlaşdırmışıq”, - deyə direktor bildirib.
Direktor deyib ki, bu qayda dəyişməz olaraq qalacaq.
[caption id="attachment_91747" align="alignnone" width="896"] Foto Xəzər Xəbər[/caption]
